Daxili siyasət

Ana səhifə

Daxili siyasət

Rəsul Quliyev Açıq Cəmiyyət Partiyasının lideri, Akif Şahbazov isə sədri seçilib

14 aprel 2007 09:43 (UTC +04:00)

Qurultay sədarət, katiblik, mandat komissiyası və redaksiya heyətinin formalaşdırılması ilə işinə başlayıb. Sonra partiyanın Qurultaya Hazırlıq üzrə Təşkilat Komitəsinin (QHTK) sədr müavini Akif Şahbazov qurultaya hazırlıq barədə məlumat verib. Onun sözlərinə görə, ADP-nin 63 rayon təşkilatının 59-da konfranslar keçirilib və 450 nümayəndə seçilib. Bundan sonra qurultayın gündəliyi təsdiq olunub. Gündəlikdə təşkilati məsələlər, Nizamnaməyə dəyişiklik edilməsi və seçkili orqanların formalaşdırılması nəzərdə tutulub. Ali Məclisin sədri kimi hesabat məruzəsi ilə çıxış edən A. Şahbazov ötən qurultaydan bu vaxta qədər həyata keçirilən tədbirlər barədə məlumat verib. Onun sözlərinə görə, bu müddətdə partiya parlament seçkilərində iştirak edib, bir sıra namizədlər yetərli səs alsalar da, onların mandatları tanınmayıb. A. Şahbazov 2005-ci il parlament seçkilərindən sonra partiya sədri Rəsul Quliyevə qarşı Sərdar Cəlaloğlunun rəhbərliyi ilə antitəbliğat başlandığını qeyd edib: “Partiyada Rəsul Quliyev tərəfdarlarına qarşı açıq təzyiq kampaniyası başlamışdı. Faktiki olaraq Yaqub Abbasovdan başqa, bütün müavinlər ona qarşı çıxış edirdilər, partiyada faktiki olaraq qiyam baş vermişdi. Buna görə də bizim birgə fəaliyyətimiz mümkün deyildi”.
Sonra Mandat Komissiyası qurultayda 380 nümayəndənin iştirak etdiyini açıqlayaraq, tədbirin səlahiyyətli olduğunu qeyd edib. Sonra qurultaya qonaq qismində dəvət olunmuş Vahid Azərbaycan Milli Birlik Partiyasının sədri Hacıbaba Əzimov, Əli İnsanovun Hüquqlarını Müdafiə Komitəsinin sədri Rizvan Talıblı, Ədalət Partiyasının sədr müavini Elxan Şükürlü, Beynəlxalq Qarabağ Fondunun rəhbəri Mehman İsmayılov çıxış ediblər. A. Şahbazov partiyanın adı ilə bağlı Təşkilat Komitəsində daim müzakirələrin aparıldığını və adın dəyişdirilməsi ilə bağlı təkliflərin irəli sürüldüyünü qeyd edib: “İndiyə kimi Azərbaycan təcrübəsində belə hallar olub ki, bəzi partiyalar parçalanıb, hər iki tərəf eyni adla fəaliyyət göstərib və 4-5 il qeyri-müəyyənlik olub. Rəsul Quliyev belə qeyri-müəyyənliyin olmaması üçün Təşkilat Komitəsinə partiyanın adının dəyişdirilməsi ilə bağlı təklif irəli sürüb. O, partiyanın bundan sonra Açıq Cəmiyyət Partiyası adlandırılmasını təklif edir”. Qurultay nümayəndələri müzakirələrdən sonra təklifin lehinə səs verərək, təşkilatlarını Açıq Cəmiyyət Partiyası (ACP) adlandırıblar. Bundan sonra qurultayın işində fasilə elan olunub. Fasilədən sonra partiyanın Nizamnaməsi və Proqramı qəbul olunub. Nizamnamədə partiyada liderlik institutunun təsis olunması və sədrlik postunun yaradılması nəzərdə tutulub. Təşkilat Komitəsinin üzvü Yaqub Abbasov bildirib ki, liderlik instutu Rəsul Quliyevin təklifi ilə Nizamnaməyə daxil edilib. Nizamnamədə partiya sədrinin Ali Məclis tərəfindən seçilməsi də əksini tapıb. Nizamnamə və Proqram qəbul edildikdən sonra Akif Şahbazov Rəsul Quliyevin partiya liderliyinə namizədliyini irəli sürüb. Qurultay yekdilliklə bu təklifin lehinə səs verib. Həmçinin R. Quliyevin qarşıdakı prezident seçkilərində ACP-nin prezidentliyə namizədi kimi irəli sürülməsi barədə qurultay qərar qəbul edib. Qurultayda Ali Məclisin üzvlərinin 1/3-i, MNTK-nın tərkibi müəyyənləşib. Qurultay adından ABŞ prezidenti Corc Buşa və Rusiya prezidenti Vladimir Putinə məktub ünvanlanıb, qurultayın qətnaməsi qəbul edilib. Müsavat başqanı İsa Qəmbər, ALP-nin sədr əvəzi Əvəz Temirxan qurultayda qonaq qismində çıxış edərək, yeni yaranmış partiyaya uğurlar arzulayıblar.
Qurultaydan sonra partiyanın Ali Məclisinin iclası keçirilib. Ali Məclisin iclasına telefonla qatılan R. Quliyev Ali Məclisin sədrliyinə Vaqif Mahmudov, Ali Məclis sədrinin müavinliyinə Aktay Mirzəyev, partiya sədrliyinə isə Akif Şahbazovun namizədliyini irəli sürüb. O, həmçinin ACP-nin İdarə Heyətinin Akif Şahbazov, Zəminə Dünyamalıyeva, Solmaz Ələsgərova, Aydın Quliyev, Fərəməz Cavadov, Vaqif Mahmudov, Aktay Mirzəyev, Yaqub Abbasov, Mahir Əsədov və Nizami Məmmədovdan ibarət heyətdə formalaşdırılmasını təklif edib. R. Quliyevin bütün təklifləri Ali Məclis tərəfindən təsdiq edilib. R. Quliyev həmçinin Solmaz Əsgərova, Zəminə Dünyamalıyeva, Aydın Quliyev və Mahir Əsədovu partiya liderinin müşavirləri təyin edib. A. Şahbazov isə toplantıda partiya sədri olaraq Yaqub Abbasov, Nizami Məmmədov və Fərəməz Cavadovu müavin təyin etməsi barədə təklifləri Ali Məclisə təqdim edib. Ali Məclis bütün təyinatları təsdiqləyib. /APA/