Daxili siyasət

Ana səhifə

Daxili siyasət

AŞ PA-da Azərbaycanın qurum qarşısında götürdüyü öhdəliklərlə bağlı müzakirələr keçirilib

16 aprel 2007 17:10 (UTC +04:00)

APA-nın Avropa bürosunun AŞ PA-da akreditə olunmuş müxbirinin məlumatına görə, müzakirələr Azərbaycan üzrə həmməruzəçi Andres Herkelin çıxışı ilə başlayıb. A. Herkelin çıxışı tənqidi məqamların çoxluğu ilə fərqlənib. O, əsasən bələdiyyələrdəki problemlər, parlament hakimiyyətinin zəifliyi, media problemləri barədə danışıb. A. Herkel “Sərbəst toplaşmaq azadlığı haqqında” qanun, məhkəmə sistemindəki problemlər haqqında da məlumat verib. O bildirib ki, qarşıdakı seçkilərə qədər bu problemlərin həllini tapması yaxşı olardı. A. Herkel Azərbaycan nümayəndə heyətinin tərkibində müxalifət təmsilçisinin olmamasından da təəssüfləndiyini deyib. A. Herkel prezidentin bir neçə əfv fərmanı imzaladığını, bunların müsbət olduğunu söyləyib. Digər həmməruzəçi Toni Lloyd isə Azərbaycanda qanunvericilik və digər sahələrdə baş verən müsbət hadisələrlə yanaşı müəyyən problemlərin də olduğunu qeyd edib. Müzakirələrdə Litvadan olan deputat, cenab Vareikis çıxış edib. O, Azərbaycanın Avropa üçün çox önəmli ölkə olduğunu, buna görə də Avropa Şurasının üzvü kimi qalmağın vacibliyi vurğulanıb. Türkiyənin AŞ PA-dakı nümayəndə heyətinin üzvləri Təkəlioğlu və Mövlud Çavuşoğlu isə Azərbaycanın mövqeyini dəstəkləyərək, ölkədə demokratik islahatların getdiyini bildiriblər. Onlar avropalı həmkarlarını Dağlıq Qarabağ probleminin həll olunmamasına diqqət yetirməyə və bu məsələ barəsində daha çox danışmağa çağırıblar.
Belçikadan olan deputat cenab Qoris isə Azərbaycanın Seçki Məcəlləsinə dəyişikliklər edilməsinin vacibliyi barədə danışıb: “Bu məsələnin həllində iqtidarla yanaşı müxalifət də konstruktiv mövqe nümayiş etdirməlidir”.
İngiltərədən olan deputat Valter bir neçə dəfə Azərbaycanda səfərdə olduğunu, bu ölkəni yaxşı tanıdığını deyib: “Bu, gənc və demokratik bir ölkədir. Məruzədən də görünüb ki, bu ölkədə çox böyük nailiyyətlər var, bu təqdirəlayiqdir. Dağlıq Qarabağ probleminin həlli məsələsinə gəldikdə isə, bu məsələ ilə bağlı Bakı və Yerevan arasında rəsmi dialoq qurulmasına ehtiyac var, bu ölkələrə vaxt verilməlidir”. Daha sonra çıxış edən AŞ PA-nın Cənubi Qafqaz ölkələrində itkin düşmüş şəxslərlə bağlı məruzəçisi Leo Platvoet çıxış edib. O, ölkədəki nailiyyətlərlə yanaşı tənqidi məqamların da olduğunu deyib, lakin Dağlıq Qarabağ məsələsindən danışmayıb. Danimarkali deputat Severinsen isə Azərbaycanda mətbuatın və müxalifətin vəziyyətində problemlərin olduğunu deyib.
Azərbaycan nümayəndə heyətinin üzvlərindən Əli Hüseynov Azərbaycanda seçki komissiyalarının professionallardan ibarət olması barədə təklif verdiklərini deyib. A. Herkel isə müxalifətin buna razı olmayacağını deyib.
Daha sonra Azərbaycan nümayəndə heyətinin üzvü Gültəkin Hacıyeva çıxış edib. O, məruzədə sabiq iqtisadi inkişaf naziri Fərhad Əliyevin həkim müayinəsindən keçməsinə icazə verilməməsi barədə müddəanın əksini tapmasına etirazını bildirib. O deyib ki, F. Əliyev öz istədiyi həkimlər tərəfindən müayinədən keçirilib. Onunla bağlı dəfələrlə həkim komissiyaları təşkil olunub. Lakin L. Platvoet buna etiraz edib, ifadə məruzədə olduğu kimi saxlanılıb.
Azərbaycanın AŞ PA-dakı nümayəndə heyətinin rəhbəri Səməd Seyidov son illər Azərbaycanda aparılan islahatlar, inkişafla bağlı məlumat verib. O, daha sonra məruzədə Fərhad Əliyevlə bağlı əks olunanlara etirazını bildirib. S. Seyidov Fərhad Əliyev və ətrafının konkret maddələrlə ittiham olunduqlarını, onların korrupsiya, dövlət əmlakını mənimsəmə və digər cinayət maddələri ilə suçlu bilindiklərini qeyd edib. Onun fikrincə, belə şəxslərin siyasi fəaliyyətlə bağlanması yanlışdır.
Azərbaycan nümayəndə heyətinin rəhbəri Fərhad Əliyev və ətrafındakı şəxslərin korrupsiyaya uğramış şəxslər olması barədə məlumatın məruzədə əksini tapmasını təklif edib. Daha sonra S. Seyidov Dağlıq Qarabağ problemi barədə də məlumat verib və həmkarlarını problemə diqqət yetirməyə çağırıb. Sonuncu çıxış edən Qənirə Paşayeva da Azərbaycanda demokratik inkişafla bağlı danışdıqdan sonra xüsusilə Dağlıq Qarabağ məsələsini, ermənilərin Azərbaycanın işğal olunmuş yerlərində tarixi abidələri dağıtmaları, Azərbaycanın qədim şəhəri Şuşanı məhv etmələri, müharibə nəticəsində Azərbaycan iqtisadiyyatına dəymiş ziyan barədə danışıb.
Müzakirələr sona çatıb və Azərbaycan nümayəndə heyətinin təklif etdiyi düzəlişlərin əksəriyyəti qəbul olunub. Bu düzəlişlər əsasən məruzədəki terminlərin daha müvafiqləri ilə əvəz edilməsilə bağlıdır.
Məruzənin səsə qoyulması zamanı Ermənistan nümayəndə heyətinin rəhbəri Tiqran Torosyan Dağlıq Qarabağ məsələsi ilə bağlı iki bənddə dəyişiklik edilməsini təklif etsə də, onun təklifləri qəbul olunmayıb.
Sonda Azərbaycanın öhdəliklərini yerinə yetirməsi ilə bağlı qətnamə səsə qoyularaq, qəbul edilib. Qətnamədə Azərbaycanda bir sıra irəliləyişlərin olduğu, öhdəliklərin yerinə yetirildiyi qeyd olunub. Eyni zamanda AŞ PA Azərbaycanın Avropa ailəsinə tam inteqrasiya etməsi üçün gələcəkdə daha artıq irəliləyişlər edəcəyinə ümidlər də əksini tapıb. /APA/