Daxili siyasət

Ana səhifə

Daxili siyasət

Açıq Cəmiyyət Partiyası “Azadlıq” blokuna üzv olmaq üçün müraciət edəcək

17 aprel 2007 14:53 (UTC +04:00)

Açıq Cəmiyyət Partiyası (ACP) “Azadlıq” blokuna üzv olmaqla bağlı sabah partiyanın İdarə Heyətində müzakirə aparacaq. Bu barədə APA-ya ACP-nin İdarə Heyətinin üzvü Yaqub Abbasov məlumat verib. Onun sözlərinə görə, partiya rəhbərliyi “Azadlıq” blokunda yenidən fəaliyyət göstərməyi və həmçinin müxalifətin daha geniş formatda birliyinin yaradılmasının tərəfdarıdır. Y. Abbasov ACP-nin ayrı-ayrı partiyalarla ikitərəfli əməkdaşlıq etməsinin də mümkün olduğunu bildirib. Bir müddət əvvəl “Azadlıq” blokunun rəhbərlərinin ADP kimi məhz Sərdar Cəlaloğlu ilə əməkdaşlıq etmək haqda qəbul etdikləri qərara gəldikdə, Y. Abbasov hesab edir ki, keçmişdə olan məsələləri qaldırmağa ehtiyac yoxdur: “Bunlar hamısı keçmişdə qalan məsələlərdir. Biz hər şeyə yenidən başlamaq fikrindəyik”.
“Azadlıq” blokunun Sədrlər Şurasının üzvü, AXCP sədri Əli Kərimli isə APA-ya açıqlamasında bildirib ki, ACP bloka üzv olmaqla bağlı müraciət edəcəyi halda, bu məsələyə prosedura uyğun olaraq baxılacaq və cavab veriləcək. Bu barədə şəxsi fikrinə gəldikdə, Ə. Kərimli bildirib ki, ACP-nin “Azadlıq” blokuna üzv olmasına müsbət münasibət bildirəcək. /APA/