Daxili siyasət

Daxili siyasət

Mübariz Qurbanlı: “Yeni Azərbaycan Partiyası Beynəlxalq Demokrat İttifaqına üzvlüklə bağlı bu quruma müraciət etməyib”

30 aprel 2007 14:22 (UTC +04:00)

Yeni Azərbaycan Partiyasının (YAP) Beynəlxalq Demokratiya İttifaqına (BDİ) üzvlüklə bağlı müraciətinə qurumun Xorvatiyada keçirilən toplantısında baxılıb və müraciətin əsaslı olmadığı bildirilib. Bu barədə APA-ya BDİ sədrinin müavini, AMİP lideri Etibar Məmmədov məlumat verib. Partiya liderinin sözlərinə görə, BDİ rəhbərliyi YAP-ın fəaliyyət prinsiplərinin onlara bəlli olmadığını, hakim partiya kimi Avropa dəyərlərinə uyğun fəaliyyət göstərmədiyini və partiyanın təqdimatçısının olmadığını əsas gətirərək üzvlüyə qəbuldan imtina ediblər: “BDİ-nin prinsiplərinə görə, əgər bir ölkədən bu quruma üzv partiya varsa, ikinci partiya üzv olmaq istəyirsə, o zaman birinci qəbul olunmuş partiyaya müraciət edilməlidir. YAP bundan əvvəl də BDİ-yə üzvlük üçün müraciət etmişdi, amma o zaman da bildirdilər ki, bununla bağlı birinci olaraq AMİP-ə müraciət edilməlidir. YAP bizim razılığımız olmadan müraciət etdiyi üçün BDİ rəhbərliyi onların müraciətinə baxmağa əsasın olmadığını bildirdi”. YAP icra katibinin müavini, millət vəkili Mübariz Qurbanlı isə bu məlumatın həqiqətəuyğun olmadığını bildirib. Onun sözlərinə görə, YAP BDİ-yə üzvlüklə bağlı bu quruma heç bir müraciət etməyib: “Sadəcə, bu quruma daxil olmağın qaydaları ilə öyrənmək üçün BDİ-nin elektron poçtuna məktub göndərilib. Məktubda yalnız şərtlərlə tanış olmaq istədiyimiz bildirilib. Əgər biz həmin quruma rəsmi müraciət etsəydik, o zaman müraciətimizə baxılan zaman bizi də həmin toplantıya dəvət edərdilər”. /APA/