Daxili siyasət

Ana səhifə

Daxili siyasət

Açıq Cəmiyyət Partiyası İdarə Heyətinin üzvü Zəminə Dünyamalıyeva: “ADP ilə münasibətlərimiz siyasi proseslərin diktəsindən asılı olacaq”

04 may 2007 12:22 (UTC +04:00)

“Sərdar Cəlaloğlu ilə şəxsi münasibətlərdə heç bir düşmənçiliyim olmayıb. Biz yalnız siyasi baxışlarımıza görə bir-birimizi ittiham etmişik. Bu baxımdan onunla düşmən deyildik ki, barışıq elan edək”. Bunu APA-ya açıqlamasında Açıq Cəmiyyət Partiyasının (ACP) İdarə Heyətinin üzvü Zəminə Dünyamalıyeva bildirib. O, S. Cəlaloğlu ilə normal münasibətlərinin olduğunu və bunun davam edəcəyini qeyd edib: “Sadəcə, ADP-də parçalanma yaranmışdısa və biz oradan qopmuşduqsa, Sərdar Cəlaloğlu deməyəcəkdi ki, “Zəminə Dünyamalıyeva çox yaxşı qızdır” və yaxud mən deməyəcəkdim ki, “Sərdar Cəlaloğlu yaxşı oğlandır”. Bizim problemlərimiz siyasi məsələlərlə bağlı idi. Bu məsələlərdə kifayət qədər fikir ayrılığı vardı və biz bir-birimizi ittiham edirdik. Biz küsülü deyildik ki, indi də barışaq. Mən 1999-cu ADP-yə gedəndən Sərdar Cəlaloğlu ilə şəxsi münasibətlərdə heç bir problemim olmayıb. Bundan sonra da olmayacaq. Sadəcə, siyasətdə hərənin öz maraqları var və bu mənada bir-birimizə fərqli münasibət bəsləyirdik”. ADP ilə bundan sonrakı münasibətlərin necə olacağına gəldikdə, Z.Dünyamalıyeva bildirib ki, siyasi məsələlər günün tələbindən asılı olaraq dəyişə bilir: “Zərurət yarandıqca, şəraitə uyğun addımlar atılır. ADP ilə münasibətlər də siyasi proseslərin diktəsindən asılı olacaq”. /APA/