Daxili siyasət

Ana səhifə

Daxili siyasət

Gürcüstan parlamentinin nümayəndə heyəti Milli Məclisdə Azərbaycan-Gürcüstan dostluq qrupunun üzvləri ilə görüş keçirib

11 may 2007 14:28 (UTC +04:00)

Gürcüstan parlamentinin nümayəndə heyəti bu gün Milli Məclisdə Azərbaycan-Gürcüstan dostluq qrupunun üzvləri ilə görüş keçirib. Qrupun sədri Qənirə Paşayeva APA-ya bildirib ki, görüş zamanı ölkələr və parlamentlərarası münasibətlər diqqət mərkəzində olub. Qonaqlar məhz mayın 10-da Bakıya böyük nümayəndə heyəti ilə gəlmələrini onunla əlaqələndiriblər ki, Heydər Əliyev təkcə Azərbaycan üçün deyin, Gürcüstan dövləti və xalqı üçün də çox böyük işlər görüb: “Bakı-Tiflis-Ceyhan, Bakı-Tiflis-Ərzurum kimi layihələr Azərbaycan xalqı və dövləti ilə yanaşı Gürcüstan xalqı və dövləti üçün də böyük əhəmiyyətə malikdir. Heydər Əliyevin dövründə Gürcüstanla Azərbaycan arasında münasibətlər daha da yaxınlaşaraq strateji tərəfdaşlıq səviyyəsinə yüksəlib. Bu siyasətin əsasını Heydər Əliyev qoyub. Ona görə də biz özümüzə borc bilirik ki, belə bir gündə Heydər Əliyevin məzarını ziyarət edək”.
Q. Paşayeva qeyd edib ki, görüşdə iki ölkənin parlamentlərində fəaliyyət göstərən dostluq qruplarının fəaliyyətinin genişləndirilməsi müzakirə olunub. İki ölkənin bir-biri ilə yüksək səviyyədə əməkdaşlığı, beynəlxalq təşkilatlar səviyyəsində çox sıx əməkdaşlıq, GUAM çərçivəsində beynəlxalq təşkilatlarda dəstək göstərildiyi qeyd olunub.
APA-nın “Gürcüstanda yaşayan azərbaycanlıların problemləri görüşdə müzakirə olunubmu” sualını cavablandıran Q. Paşayevanın dediyinə görə, görüşdə xüsusi vurğulanıb ki, Gürcüstanda yaşayan azərbaycanlılar və Azərbaycanda yaşayan gürcülər iki ölkəni bir-biri ilə daha sıx bağlayan tellərdir. Milli Məclisin deputatları Gürcüstan parlamentinin üzvlərindən bu ölkədə yaşayan soydaşlarımızın müraciətləri əsasında təhsil islahatları zamanı azərbaycanlıların rastlaşa biləcəyi problemlərin, torpaq probleminin həllində və regional televiziyanın açılmasında köməklik göstərilməsini xahiş ediblər: “Görüş iştirakçıları qərara gəliblər ki, qarşılıqlı səfərlər daha da genişlənməlidir. Birgə dostluq qruplarının üzvləri Gürcüstanda azərbaycanlıların və Azərbaycanda gürcülərin yaşadıqları bölgələrdə görüşlər keçirilməsini də məqsədəuyğun sayıblar”. /APA/