Daxili siyasət

Ana səhifə

Daxili siyasət

Lalə Şövkət: “Müxalifət partiyalarının Seçki Məcəlləsinə dəyişikliklə bağlı vahid mövqedən çıxış edə bilməməsi çox pis haldır”

11 may 2007 15:22 (UTC +04:00)

“Müxalifət partiyalarının Seçki Məcəlləsinə dəyişikliklə bağlı vahid mövqedən çıxış edə bilməməsi çox pis haldır”. Bunu APA-ya açıqlamasında Milli Birlik Hərəkatının lideri Lalə Şövkət bildirib. Seçki Məcəlləsi ilə bağlı müxalifətin vahid mövqe nümayiş etdirməsinin vacib olduğunu deyən L. Şövkət məhz bu məqsədlə 2005-ci ildə Müsavatla yollarının ayrılmasına baxmayaraq, əməkdaşlıq əli uzatdıqlarını və vahid sənədlə çıxış etməklə bağlı təklif irəli sürdüklərini qeyd edib: “Amma biz təəssüf edirik ki, bu dəfə də Müsavat rəhbərliyi təklifləri qəbul etmədi və öz təklifləri ilə çıxış etdi. Biz də “Azadlıq” bloku olaraq öz layihəmizi hazırlayıb müvafiq təşkilatlara göndərdik”. Blokun əlavə və dəyişikliklərlə bağlı layihəni Venesiya Komissiyasına göndərdiyini deyən L. Şövkət əsas tələbin Avropa Şurası qarşısında götürülmüş öhdəliklərin yerinə yetirilməsi olduğunu bildirib: “Bu öhdəliklərin yerinə yetirilməsi Azərbaycanın beynəlxalq nüfuzu üçün vacibdir. Blokun da əsas meyarı Azərbaycanda həqiqətən azad seçkilərin keçirilməsidir. Biz bunun üçün çalışırıq”. /APA/