Daxili siyasət

Ana səhifə

Daxili siyasət

Müsavat Partiyası mayın 27-nə təyin etdiyi aksiyanı təxirə salıb

24 may 2007 12:36 (UTC +04:00)

Bakı şəhər İcra Hakimiyyəti (BŞİH) Müsavat Partiyasının mayın 27-də yürüş-mitinq keçirməklə bağlı məktubuna cavab verib. Partiyanın mətbuat xidmətindən APA-ya verilən məlumata görə, BŞİH Müsavata mayın 27-də yox, 26-da aksiya keçirməyə icazə verib. Şəhər İcra Hakimiyyəti bunu “Sərbəst toplaşmaq azadlığı haqqında” qanunun tələbi ilə izah edib. Müsavat Partiyası isə BŞİH-nin bu addımını qeyri-qanuni sayır və bununla bağlı bəyanat yayıb. Bəyanda bildirilir ki, qanuna müvafiq olaraq mitinqin keçirilməsinin yeri və vaxtını təşkilatçılar təyin etməlidir: “Qanun mitinqin vaxtının dəyişdirilməsinə müstəsna hallarda yol verir. İndiki şəraitdə isə qanunda göstərilən halların heç biri mövcud deyil”. Bəyanat müəllifləri hesab edir ki, təşkilatçılarla müzakirə etmədən mitinqin vaxtının dəyişdirilməsi, əslində, tədbirin keçirilməsinin qarşısını almaq məqsədi daşıyır: “Müsavat Partiyası Bakı İcra Hakimiyyətinin bu addımını əhalinin sərbəst toplaşmaq azadlığının kobud şəkildə pozulması kimi qiymətləndirir”.
Qeyd edək ki, BŞİH-nin cavabı partiya rəhbərliyində müzakirə olunub və aksiyanın təxirə salınması haqqında qərar verilib. /APA/