Daxili siyasət

Daxili siyasət

Migel Anhel Moratinos və Qoran Lenmarker partiya rəhbərləri ilə görüşüblər

05 iyun 2007 07:45 (UTC +04:00)

APA-nın məlumatına görə, görüş qapalı keçirilib. Görüşdə Müsavat başqanı İsa Qəmbər, Milli Birlik Hərəkatının lideri Lalə Şövkət, AXCP sədri Əli Kərimli, Vətəndaş və İnkişaf Partiyasının rəhbəri Əli Əliyev, Azərbaycan Naminə İctimai Forumun prezidenti Eldar Namazov və ASDP həmsədri Araz Əlizadə iştirak ediblər.
Görüşdən sonra jurnalistlərə açıqlama verən Lalə Şövkət bildirib ki, ATƏT-in fəaliyyətdə olan sədri və ATƏT Parlament Assambleyasının rəhbəri ilə əsasən mətbuata təzyiqlər və siyasi partiyaların fəaliyyətinə qoyulan məhdudiyyət məsələlərini müzakirə ediblər: “Son aylarda 7 jurnalist həb olunub. Biz artıq neçə ildir, televiziyaya çıxa, öz mövqeyimizi cəmiyyətə çatdıra, regionlarda konfranslar, şəhərin mərkəzində isə mitinq keçirə bilmirik”. Lalə Şövkətin sözlərinə görə, Azərbaycanda seçkilərin demokratikliyini təmin etmək üçün seçki prosesinin Mərkəzi Seçki Komissiyasının monopoliyasından çıxarılmasının vacibliyi M. A. Moratinos və Q. Lenmarkerin diqqətinə çatdırılıb. Müxalifət nümayəndələri ümidvar olduqlarını bildiriblər ki, prezident İlham Əliyev Dağlıq Qarabağ münaqişəsinin həlli ilə bağlı onlarla müzakirə aparacaq: “Çünki Qarabağ ümummilli məsələdir. Ona görə də ümid edirik ki, prezident bizimlə məsləhətləşmələr keçirəcək, sonra isə hansısa həll variantı müzakirə olunacaq. Bizi narahat edən məsələ referendumla bağlıdır. Azərbaycan Konstitusiyasına zidd olaraq ərazi bütövlüyü ilə bağlı referendum keçirilə bilməz. Dağlıq Qarabağda referendum keçirilməsi Dnestryanı, Abxaziya və Osetiya separatçıları üçün presedent ola bilər”. /APA/