Daxili siyasət

Ana səhifə

Daxili siyasət

AŞ PA prezidenti Rene van der Linden: “Azərbaycanda mətbuatın vəziyyəti ilə bağlı durum diqqətimizdədir”

01 oktyabr 2007 12:28 (UTC +04:00)

APA-nın Avropa bürosunun AŞPA-nın sessiyasını izləyən əməkdaşının məlumatına görə, Azərbaycanda mətbuatın vəziyyəti ilə bağlı sualı cavablandıran prezident daha çox siyasi məhbuslar məsələsindən danışıb: “Bütün siyasi məhbusları azad etmək Avropa Şurasına üzv ölkələrin hamısı üçün çox vacibdir. Ümumiyyətlə, siyasi məhbus konsepsiyası heç cür qəbul edilə bilməz. Biz bir neçə dəfə bunu qeyd etmişik, bundan başqa, mən bu həftə Azərbaycan nümayəndə heyətinin üzvləri ilə görüşmüşəm, bu məsələni onların da diqqətinə çatdırmışam”.
Rene van der Linden daha sonra AŞ PA-nın itkin düşmüş şəxslər üzrə məruzəçisi Leo Platvoeti yanlış olaraq, Azərbaycanda siyasi məhbus məsələri üzrə məruzəçi kimi təqdim edib: “ Ümid edirəm ki, cənab Platvoetdən sonra yeni məruzəçimiz olacaq. Siyasi məhbuslarla bağlı yeni məruzəçinin çox kəskin mövqe tutacağına da ümid edirəm. Biz bu məsələni bütün ölkələr üçün lazım bilirik, xüsusən də Avropa Şurasına üzv olan ölkələr üçün”. Rene van der Linden bildirib ki, siyasi məhbus məsələsi bütün müzakirələri dayandırır. O, Belarusu misal çəkib: “Mən Belarus rəhbərliyinə danışıqları davam etdirmək üçün ilk şərtlərdən birinin siyasi məhbusları azad etmək olduğunu bildirdim”.
Daha sonra Rene van der Linden qeyd edib ki, Azərbaycanda mətbuatın vəziyyəti və siyasi məhbuslarla bağlı sessiyanın gündəliyində ayrıca məsələnin müzakirəsi nəzərdə tutulmur. Amma o, üzv ölkələrin hər birində baş verən problemdən xəbərdar olduqlarını və diqqətdə saxladıqlarını söyləyib. O, jurnalistlərin və siyasi fəaliyyəti olan şəxslərin həbsini alqışlamadıqlarını da qeyd edib: “Biz bu məsələləri diqqətdə saxlayıb, əlavə məlumatlar əldə etməyə çalışırıq. Mən bu məsələləri oktyabrın 3-də Azərbaycan parlamentinin spikeri Oqtay Əsədovla görüşümdə də gündəmə gətirəcəyəm”.
Azərbaycanda 2008-ci ildə keçiriləcək president seçkiləri ilə bağlı suala cavabında Rene van der Linden AŞ PA-nın müşahidə missiyasının seçkini izləyəcəyini söyləyib: “ Amma seçkidən öncə də bir qayda olaraq, ölkəyə müşahidəçilər göndəriləcək”. /APA/