Daxili siyasət

Ana səhifə

Daxili siyasət

Tacikistan XİN-in idarə rəisi: “Düşənbədə MDB dövlət başçılarının iştirakı ilə üç görüş keçiriləcək”

02 oktyabr 2007 13:45 (UTC +04:00)

O bildirib ki, oktyabrın 5-də Düşənbədəki “Somon” sarayında prezidentlərin görüşü olacaq. Ukrayna prezidenti Viktor Yuşşenko istisna olmaqla, bütün dövlət başçıları sammitdə iştiraklarını təsdiqləyiblər. Prezidentlər MDB-nin sonrakı inkişaf konsepsiyası layihəsini müzakirə edəcəklər. Əsas diqqət təhlükəsizlik məsələlərinə yönələcək. Xarici İşlər Nazirləri Şurasının oktyabrın 4-də “Vəhdət” sarayında keçiriləcək iclasının gündəliyinə isə müxtəlif xarakterli 20-yə yaxıb məsələ daxil edilib. Nazirlərin təsdiqlədiyi sənədlər prezidentlər tərəfindən imzalanacaq. R. Dodocanovun sözlərinə görə, prezidentlər əməkdaşlıqla bağlı birgə bəyanatla çıxış edəcək: “Qazaxıstan tərəfi narkotiklərlə mübarizəyə dair bəyanat hazırlayıb. Yəqin ki, dövlət başçıları bu bəyanata da imza atacaq”. R. Dodocanov oktyabrın 6-da Düşənbədə Avrasiya İqtisadi Birliyinin dövlətlərarası şurasının prezidentlər səviyyəsində görüşünün və Kollektiv Təhlükəsizlik Müqaviləsi Təşkilatı şurasının yığıncağının keçiriləcəyini söyləyib. Oktyabrın 7-də isə MDB dövlət başçılarının qeyri-rəsmi görüşü olacaq. Görüşdə Tacikistan, Rusiya, Azərbaycan, Qazaxıstan, Özbəkistan, Qırğızıstan, Moldova və Ermənistan prezidentləri iştirak edəcək. “Qalstuksuz” söhbətlərdə dövlət başçıları qarşılıqlı əməkdaşlıq məsələlərinə toxunacaqlar.
R. Dodocanov bildirib ki, Azərbaycan prezidenti İlham Əliyev oktyabrın 5-də Düşənbədə olacaq. Səfər iki gün davam edəcək. İ. Əliyev dövlət başçılarının həmin gün keçiriləcək rəsmi və oktyabrın 7-də keçiriləcək qeyri-rəsmi görüşlərinə qatılacaq. Azərbaycan prezidentinin bir sıra ikitərəfli görüşləri də nəzərdə tutulub. İ. Əliyev ayın 7-də vətənə dönəcək. Xatırladaq ki, dövlət başçısı bu ilin martında Tacikistanda rəsmi səfərdə olub. /APA/