Daxili siyasət

Ana səhifə

Daxili siyasət

Küveyt Universitetinin professoru: “Azərbaycanın üçrəngli bayrağı Dağlıq Qarabağda mütləq dalğalanacaq”

12 may 2008 14:02 (UTC +04:00)

Bakı - APA. Heydər Əliyevin anadan olmasının 85 illiyi ilə bağlı Bakıda "Demokratiya və sabitlik naminə: Əməkdaşlığın yeni imkanları" mövzusunda keçirilən beynəlxalq konfransın iştirakçılarından olan Küveyt Universitetinin ictimai elmlər fakültəsinin siyasi elmlər departamentinin rəhbəri, professor Əbdül-Reda Assiri “İki sahil” qəzetinin redaksiyasında olub. Qəzetdən APA-ya verilən məlumata görə, görüş zamanı Əbdül-Reda Assiri Azərbaycanda mətbuat azadlığının yüksək səviyyədə olduğunu bildirib. Qonaq deyib ki, Azərbaycanda şərqlilərə məxsus millilik qorunub saxlanılmaqla Avropa dəyərlərinə də hörmətlə yanaşılır, dünya təcrübəsindən istifadə olunur: “Bu, bir daha göstərir ki, Azərbaycan gələcək inkişafını bəşəri dəyərlər əsasında qurmaqla dünya birliyinə daha tez inteqrasiya olunmaqdadır”. Əbdül-Reda Assiri Küveytdəki KİV-lə bağlı məlumat verərkən deyib ki, təmsil etdiyi ölkədə hazırda cəmi 5 mətbu orqanı fəaliyyət göstərir: “Parlament tərəfindən "Mətbuat haqqında" qanunun qəbulundan sonra mətbu orqanların sayı 13-ə çatdırılacaq və eyni zamanda burada bir neçə qəzet ingilis dilində nəşr ediləcək”.
Qonaq daha sonra bildirib ki, Azərbaycana növbəti səfəri zamanı ölkəmizin tarixi ərazisi olan Dağlıq Qarabağla azərbaycanlıların müşayiəti ilə tanış olacağına inanır: “Prezident İlham Əliyevin qətiyyəti sübut edir ki, o günə az qalıb. Azərbaycanın üç rəngli bayrağı Dağlıq Qarabağda mütləq dalğalanacaq”.