Daxili siyasət

Ana səhifə

Daxili siyasət

Rauf Arifoğlu Əli Kərimliyə xəbərdarlıq edib

14 may 2008 15:05 (UTC +04:00)

Bu barədə APA-ya açıqlamasında “Yeni Müsavat” qəzetinin baş redaktoru Rauf Arifoğlu bildirib. ACP-nin sədr müavini Yaqub Abbasov və ALP-nin sədr əvəzi Əvəz Temirxanın özü və “Yeni Müsavat” qəzeti ilə bağlı açıqlamalarına münasibət bildirən R. Arifoğlu deyib ki, rəhbərlik etdiyi mətbuat orqanında barələrində işlədilən ifadələrə adekvat olan heç bir yazı dərc olunmayıb: “Əvəz Temirxan, ümumiyyətlə, bu cür hadisələrdə belə davranır. Amma onun açıqlamasını dərc edən “Azadlıq” qəzeti gərək heç olmasa bizim cavab vermək hüququmuzu tanıyaydı. Təəssüf ki, bu cür yazı qəzetdə dərc olunub. Bu yazını oxuyan adam ilk olaraq düşünür ki, bununla bağlı mütləq məhkəməyə müraciət olunsun. Çünki o yazıda yolverilməz həddə qədər təhqir elementləri var. Amma mən Əvəz Temirxanı qeyri-ciddi adam hesab etdiyimdən, həm də bu yazı “Azadlıq” qəzetində dərc olunduğundan, bu addımı atmaq fikrində deyiləm. Amma proses davam etsə, şərəf və ləyaqətimizi qorumaq istiqamətində düşünəcəyik. Mən “Azadlıq” qəzetinin sahibi Əli Kərimliyə xəbərdarlıq edirəm ki, adamlarını üstümüzdən çəksin. Onun adamları, qəzetdəki mirzələri bizim qəzetimizin başlıq siyasətinə qədər hər şeyi təftiş edirlər. Mən bunu son hədd hesab edirəm”.
R. Arifoğlu onu da deyib ki. Ə. Temirxanın onun baş nazirin müavini postuna iddia etməsi barədə fikirləri fantaziyanın məhsuludur: “Əvvəla, mənim baş nazirin müavini postunda gözüm yoxdur. İkincisi, hakimiyyət müxalifətdə olanlara, xüsusən də mənim kimi adama nəinki baş nazirin müavini, heç JEK müdirinin müavini vəzifəsini də verməz. Sadəcə, biz yazmışdıq ki, hakimiyyətin bölgüsündə müxalifətin də iştirakını nəzərdə tutan bir layihəyə görə, Qərbin iki nazir və baş nazirin humanitar məsələlər üzrə müavini vəzifələrini müxalifətə verməklə bağlı təklifləri var. Amma ən qərəzli və ən axmaq adam hesab edə bilər ki, baş nazirin müavini postu üçün özümü nəzərdə tuturam. Mən ən yuxarı vəzifəmi - öz yaratdığım qəzetdə baş redaktor postunu almışam”.
Y. Abbasovu isə siyasətdə naşı adlandıran baş redaktor deyib ki, bəzi hallarda o, özünə də sərf etməyən açıqlamalar verir: “Onun açıqlamaları ilə təmsil etdiyi partiyanın sədri Rəsul Quliyevin yürütdüyü siyasət arasında diametral ziddiyyətlər var”. R. Arifoğlu deyib ki, Y. Abbasovun fikirləri ilə bağlı hələlik məhkəmə mərhələsinin başlanmasını arzu etmir. Bununla belə, o, əlavə edib ki, partiya funksionerinin bu kimi açıqlamaları davam etsə, məhkəməyə müraciət edəcək: “Mən istər Yaqub Abbasovun, istərsə də “Azadlıq” qəzetinin ayrı-ayrı şəxslər vasitəsi ilə üstümüzə yağdırdığı çirkab və böhtan kampaniyasına aid materialları yığıram. Proses davam etsə, mənim onları məhkəməyə verməyim mümkündür”.
Qeyd edək ki, Ə. Temirxan açıqlamasında R. Arifoğlunun “Azadlıq” bloku barədə yazdığı yazıların çirkin məqsədlərə xidmət etdiyini, onun hakimiyyətə öz xidmətini təklif etdiyini bildirib. Y. Abbasov isə "Yeni Müsavat"ın ölkədəki siyasi proseslərdə obyektivlik, dəqiqlik, etika anlayışını gözləmədiyini, qəzetin daim müəyyən maraqlara, ölkədə separatizmin güclənməsinə xidmət etdiyini, etnik qruplar arasında qarşıdurma yaratmağa çalışdığını bildirib.