Digər xəbərlər

Ana səhifə

Digər xəbərlər

Avropa Komissiyasının prezidenti Azərbaycanın Xocalı şəhərində qanlı aktın həyata keçirildiyini etiraf edib

13 may 2008 08:18 (UTC +04:00)

Azərbaycanın Belçika və Lüksemburq üzrə səfirliyinin, Avropa İttifaqı yanında nümayəndəliyin birinci katibi, BATƏŞ-in fəxri prezidenti Fuad Hümbətovun APA-ya verdiyi məlumata görə, Avropa Komissiyası tərəfindən BATEŞ-ə ünvanlanan məktubda Azərbaycanın Xocalı şəhərində həqiqətən də faciənin, qanlı aktın, insanlıq dramının törədildiyi Avropa Komissiyasının prezidenti Xose Manuel Barrossonun adından açıq ifadə edilib. “Beləliklə, Avropa Komissiyası kimi mötəbər beynəlxalq qurumun rəsmi məktubunda indiyədək ilk dəfə olaraq Xocalı faciəsi barədə daha obyektiv ifadələr işlədilib” deyən F. Hümbətovun sözlərinə görə, məktubda Avropa Komissiyasının dəfələrlə bütün müharibə və zorakılıq aktlarını, o cümlədən müraciətdə qeyd edilən hadisə kimi aktları pislədiyi vurğulanıb: “Xocalıda baş vermiş faciəvi faktlar bizə hər gün xatırladır ki, müharibə hər iki tərəfdə çəkilmiş əzablar, insan itkiləri, fəryadlar deməkdir. Məhz bu səbəbdən Avropa Komissiyası münaqişələrin danışıqlar və bütün tərəflər arasında dialoq yolu ilə həllinin tərəfdarıdır. Dağlıq Qarabağ münaqişəsi də bu qəbildən istisna deyil. Biz gələcəkdə də bütün imkanlardan istifadə edərək, tərəfləri münaqişənin tez bir zamanda və sülh yolu ilə həllinə nail olmağa çağıracağıq”.
F. Hümbətov məktubu şərh edərək bildirib ki, artıq Xocalı faciəsinin tədricən bəşəriyyət əleyhinə cinayət və soyqırımı kimi tanınmasına başlanılıb: “Biz bu tanıtım işini təkcə hər ilin fevral ayında deyil, sistematik olaraq hər gün həyata keçirməliyik”.