Bakı. Könül Kamilqızı - APA. AMEA Dilçilik İnstitutunun strukturunun təkmilləşdirilməsi və maddi-texniki bazasının müasirləşdirilməsinin təmin edilməsi məqsədilə institutun yeni strukturu qurulub.
APA-nın xəbərinə görə, bu barədə AMEA Dilçilik İnstitutunun direktor əvəzi Fəxrəddin Veysəlov “Azərbaycan dilinin qloballaşma şəraitində zamanın tələblərinə uyğun istifadəsinə və ölkədə dilçiliyin inkişafına dair Dövlət Proqramı”nın icrası ilə bağlı yaradılmış işçi qrupunun iclasında məlumat verib.
O bildirib ki, aparılan struktur dəyişikliklərinə əsasən, institutun bəzi şöbələri birləşdirilib, bəzi şöbələr iki hissəyə bölünüb, bəzi şöbələr isə yeni yaranıb. F.Veysəllinin sözlərinə görə, aparılan struktur dəyişiklikləri nəticəsində 10 şöbə formalaşıb: “Bunlara “Müasir Azərbaycan dili”, “Dil tarixi və dialektologiya”, “Sosial-linqvistika və dil siyasəti”, “Qədim dillər və mədəniyyətlər”, “Nəzəri dilçilik”, “Tətbiqi dilçilik”, “Hind-Avropa dilləri”, “Monitorinq”, “Türk dilləri” və yeni dövrlə ayaqlaşan “Kompüter” şöbələri daxildir. Bu yeni şöbələrin siyahısı AMEA Rıyasət Heyətinə təqdim olunacaq və qəbul edildiyi təqdirdə yeni struktur formasında fəaliyyət göstərəcək”.
Dövlət Proqramının icrası ilə bağlı yaradılmış işçi qrupunun rəhbəri Kamal Abdulla Dilçilik İnstitutunun yeni strukturunun yaradılmasının çox zəruri və lazımlı addım olduğunu deyib. O bildirib ki, bu məsələ prezidentin sərəncamında da öz əksini tapıb, proqramın bəzi bəndlərinin icrası Dilçilik İnstitutunun yeni yaradılan şöbələrində icra ediləcək.
K.Abdulla qeyd edib ki, AMEA Dilçilik İnstitutunda “Qaynar xətt” xidməti yaradılacaq. Onun sözlərinə görə, hansı şəhərdə yaşamağından asılı olmayaraq, hər bir Azərbaycan vətəndaşı zəng edərək küçələrdə olan yazılarda dil qaydalarının pozulması ilə bağlı öz fikir və narazılıqlarını bildirəcəklər: “Onları yoxlamaq və yerindəcə düzəltdirmək icra hakimiyyətindən asılıdır. Dilçilik İnstitutu isə onun həlli yolları ilə bağlı reseptlərini verəcək”.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
