Bakı. Şamil Əlibəyli - APA. Bu gün “Eurovision-2013” mahnı müsabiqəsinə ev sahibliyi edəcək İsveçin Malmö şəhərində birinci və ikinci yarımfinallarda iştirak edəcək ölkələrin sıra nömrələri müəyyən edilib.
APA-nın “Eurovision”un rəsmi saytına istinadən verdiyi məlumata görə, Azərbaycanın təmsil edəcək Fərid Məmmədov mayın 16-da keçiriləcək ikinci yarımfinalda 4 nömrə altında çıxış edəcək. Ondan əvvəl isə Latviya, San-Marino və Makedoniya təmsilçiləri çıxış edəcək. Azərbaycandan sonra isə Finlandiya, Malta, Bolqarıstan, İslandiya, Yunanıstan, İsrail, Ermənistan, Macarıstan, Norveç, Albaniya, Gürcüstan, İsveçrə və Rumıniya səhnəyə çıxacaq.
Builki püşkatmanın özəlliyi ondan ibarətdir ki, təmsilçilərin növbəliliyini müsabiqənin təşkilatçıları müəyyən edirdilər. Belə ki, təşkilatçılar eyni üslubda ifa olunan iki mahnının bir-birindən sonra düşməsinin qarşısını almaq istəyiblər.
Qeyd edək ki, Azərbaycan təmsilçisi Fərid Məmmədov müsabiqədə “Hold Me” adlı mahnını ifa edəcək.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
