Ədəbiyyat

Ana səhifə

Ədəbiyyat

Aşıq Ədalət: “Övladlarıma sazı mənimlə basdırmağı vəsiyyət eləmişəm”

29 yanvar 2007 10:22 (UTC +04:00)

- Son dövrlər ekran-efirdə görünmürsünüz...
- Azərbaycandayam, bir yerə getməmişəm. Yeddi ildir ki, Bakıda yaşayıram. Prezident təqaüdçüsü, əməkdar incəsənət xadimiyəm. Mən həmişə öz işimlə məşğul olmuşam. Amma son dövrlər məclislərə az-az gedirəm. Səhhətim də arabir dəyişir. Gah yaxşı olur, gah da pis.
- 70 illik yubileyinizin dövlət səviyyəsində qeyd olunması gözlənilirmi?
- Bu, Mədəniyyət və Turizm Nazirliyindən asılı olan məsələdir. Dəqiq bilmərəm, layiq görsələr, yəqin qeyd edərlər.
- Nəyə görə indiyə qədər Sizə fəxri ad verməyiblər?
- Mənə xalq artisti adı vermək üçün təqdimat yazmaq istədilər, amma razılaşmadım. Mən artist deyiləm, el aşığıyam. Mənə xalq aşığı adı verilməsini istəyirəm. Deyirlər, gərək bununla bağlı Milli Məclis qərar çıxarsın. İstəyirəm, Azərbaycanın ilk xalq aşğı fəxri adına mən layiq görülüm.
- Sizdən sonra sazınızı kim çalacaq?
- Bir dəfə jurnalist Firudin Şuşinski yazmışdı: “Məndən olsa, Ədalətdən sonra sazı məhv edərəm”. Övladlarıma sazı mənimlə basdırmağı vəsiyyət eləmişəm. Bu məsələ ilə bağlı mənə çox təkid eləyiblər. Özümlə basdıracağım saz evdədir. Onun üzünü sökdürmüşəm. Sazın üzünün ürəyimin üstünə qoyulmasını vəsiyyət etmişəm. Saz mənimlə getməlidir. Artıq 10 ildir ki, bu barədə qəti qərar vermişəm, övladlarım da bilir. Özümlə bu dünyadan pul-var aparmıram, bircə sazımı istəyirəm.
- Klassik aşıq sənətinin bugünkü vəziyyəti Sizi qane edirmi?
- Bu gün məndən istifadə eləmirlər. Vaxt var idi ki, sazı 5-10 manata alan yox idi, amma indi sazın qiyməti 500 dollar olub. Bunu Ədalət eləyib. Sazı dünyanın 50 ölkəsində gəzdirmişəm. Məndə sonra nə olacaq, bilmirəm. Çalmağına çalacaqlar, ancaq Ədalət olmayacaq.
- Sevə-sevə çaldığınız saz havası hansıdır?
- Saz havalarının arasında fərq qoymamışam. Hansı havanı çalmışamsa, ürəklə çalmışam. Deyirlər ki, 72 saz havası var. Amma bunu dəqiq söyləmək olmaz. Elə bir adam yoxdur ki, heç olmasa 30-40 saz havasının adını deyə bilsin. Mən də bu məsələyə heç vaxt diqqət eləməmişəm. Elə sazı əlimə götürüb, çalmışam.
- Övladlarınızın arasında bu sənəti davam etdirəni varmı?
- Övladlarımın hamısı musiqini bacarır, oğlum Şücaət də saz çalır. Oğlumun saz çalmağına razı olardım, amma o, Ədalət deyil axı. Nəvələrimə də saz çalmağı öyrədə bilərəm, amma barmağımı kəsib onlara verə bilmərəm. Qazaxda 16 sənətkarın heykəlini ucaldıblar. Onların içində yaşayanı tək mənəm. Mən öz haqqımı almışam. /APA/