Ədəbiyyat

Ana səhifə

Ədəbiyyat

Mədəniyyət və Turizm Nazirliyi illik fəaliyyəti ilə bağlı hesabat yayıb

30 yanvar 2007 16:14 (UTC +04:00)

Bu gün Yanvarın 30-u Mədəniyyət və Turizm Nazirliyinin fəaliyyətə başlamasının bir ili tamam olur. Nazirlik bir illik fəaliyyəti ilə bağlı hesabat yayıb. Nazirliyin mətbuat xidmətindən APA-ya daxil olan hesabatda bildirilib ki, 2006-cı ildə nazirliyin təşəbbüsü ilə Azərbaycanda 156 dövlət əhəmiyyətli tədbir keçirilib, dövlət teatrlarında 78 yeni və əsaslı bərpa olunmuş tamaşa hazırlanıb. Bu il bir çox sənət adamlarının yubiley və yaradıcılıq gecələri keçirilib. Bu tədbirlər çərçivəsində Vyananın Kammeroper Teatrında Üzeyir Hacbəyovun “Arşın mal alan” operettası yeni quruluşda tamaşaya qoyulub. Bu il “Yaddan çıxmaz Qarabağ” adlı ümumrespublika mədəni-siyasi aksiya -incəsənət həftəsi keçirilib. Bakıda fəaliyyət göstərən Dövlət Teatrı-Azərbaycan Dövlət Akademik Opera və Balet Teatrı, Azərbaycan Dövlət Akademik Milli Dram Teatrı, Azərbaycan Dövlət Rus Dram Teatrı, Azərbaycan Dövlət Gənc Tamaşaçılar Teatrı, Azərbaycan Dövlət Kukla Teatrı binalarının təmir-bərpası və texnoloji sistemlərinin yenidən qurulması işləri daxil edilib. Hesabat ilində Mədəniyyət və Turizm Nazirliyinin tabeçiliyində olan C.Cabbarlı adına Respublika Gənclər Kitabxanası və M.F.Axundov adına Azərbaycan Milli Kitabxanası, daha15 kitabxana təmir olunub.
Ötən il Budapeştin Etnoqrafiya Muzeyində “Azərbaycan günü” keçirilib, Fransa vəı Almaniyada Azərbaycan ilinin keçrilməsi üçün hazırlıqlar aparılıb, Azərbaycanda Rusiya ili qeyd olunub. Ölkənin bir neçə rayonlarının mədəniyyət və turizm idarələrinin rəhbərləri dəyişdirilib, digərləri isə yenidən təsdiq olunub. Ötən il 250-yə yaxın abidənin texniki vəziyyətinə baxış keçirilib. İlk dəfə olaraq Qaradağdakı “Qobustan” dövlət tarixi-bədii qoruğu, Qusarın Həzrə kəndindəki “Şeyx Cüneyd” türbəsinin, Hacıqabuldakı “Pir Hüseyn” xanəgahının, Qobustanın Mərəzə qəsəbəsindəki “Diri Baba” türbəsinin istiqamətini göstərən yol nişanlarının eskizləri hazırlanıb. İşğal olunmuş Azərbaycan torpaqlarında qalmış abidələrin siyahısı dəqiqləşdirilib, onların ermənilər tərəfindən dağıdılması ilə bağlı müxtəlif təşkilatlara məlumatlar verilib. 2006-cı ildə kinematoqrafiya sahəsinin inkişaf etdirilməsi, kino müəssisələrinin fəaliyyətinin müasir tələblər səviyyəsində qurulması istiqamətində tədbirlər həyata keçirilib. Nəşriyyat, informasiya, reklam, turizm, beynəlxalq mədəni əlaqələr sahəsində də bir sıra layihələr həyata keçirilib.
Qeyd edək ki, Mədəniyyət və Turizm Nazirliyinin fəaliyyət dairəsinə 28 teatr, 6308 tarix və mədəniyyət abidəsi, 1 sirk və 12 konsert müəssisəsi, 1 sərgi salonu, 3966 kitabxana, 2703 klub, 169 dövlət muzeyi (filiallarla birlikdə), 260 uşaq musiqi, incəsənət və rəssamlıq məktəbi, 33 rəsm qalereyası və sərgi salonu, 21 dövlət qoruğu, 60 mədəniyyət və istirahət parkı, 1 zoopark, mədəniyyət üzrə 3 mərkəz, 4 asudə vaxt mərkəzi, 6 təsərrüfat təşkilatı, “Azərbaycanfilm” kinostudiyası da daxil olmaqla 7 kinostudiya, şəhər və rayon kinoteatrları, Dövlət Film Fondu (Naxçıvan filialı ilə birlikdə), Respublika Kitabxana Kollektoru, üç qəzet (“Mədəniyyət”, “Yaddaş”, “Kino+”), bir jurnal (“Mədəni-maarif”) redaksiyası, Dövlət Turizm İnstitutu, Bakı Xoreoqrafiya Məktəbi, Mədəniyyət İşçilərinin İxtisasartırma Mərkəzi, Mingəçevir Turizm Kolleci, Milli Kulinariya Mərkəzi, 64 şəhər, rayon mədəniyyət və turizm şöbəsi, Bakı, Gəncə, Sumqayıt şəhər turizm idarələri, Şəki Atçılıq Turizm Mərkəzi, Bakı Turizm İnformasiya Mərkəzi, “Gənclik” Beynəlxalq Turizm Mərkəzi, Lənkəran Uşaq Düşərgəsi daxildir. Nazirliyin mərkəzi aparatında 160 mütəxəssis çalışır. /APA/