Ədəbiyyat

Ana səhifə

Ədəbiyyat

Almanların Xanlar rayonunda inşa etdiyi binalar təmir olunur

02 fevral 2007 10:50 (UTC +04:00)

2006-cı ildə Xanlar rayonunda bir neçə tarixi abidələrdə əsaslı və cari təmir işləri görülüb. Təmir əsasən almanlar tərəfindən inşa edilmiş və hal-hazırda inzibati bina kimi fəaliyyət göstərən evlərdə aparılıb. Xanlar rayon Mədəniyyət və Turizm İdarəsinin rəisi Şərqiyə Verdiyevanın APA-nın qərb bürosuna verdiyi məlumata görə, rəhbərlik etdiyi idarədə 31 tarixi abidə qeydiyyatdadır. 2006-cı il ərzində Xanlar Rayon Polis İdarəsinin, Xanlar Rayon Prokurorluğunun və Yeni Azərbaycan Partiyası Xanlar rayon təşkilatının yerləşdiyi almanlar tərəfindən tikilmiş binalarda əsaslı, almanlar tərəfindən tikilmiş digər inzibati binalarda isə cari təmir işləri aparılıb. Xanlar rayonunda yerləşən, almanlar tərəfindən inşa edilmiş Şampan Şərabı Sexində 2006-cı ilin sonundan başlayaraq əsaslı təmir işləri aparılıb və hal-hazırda davam etdirilir. 2006-cı il ərzində bir neçə dəfə Almaniyadan mütəxəssislər gələrək, 1854-cü ildə almanlar tərəfindən inşa edilmiş Xanlar Tarix-Diyarşünaslıq Muzeyinin yerləşdiyi Lüteran kilsəsinin əsaslı təmiri üçün baxış keçiriblər. Ş.Verdiyevanın dediyinə görə, almaniyalı mütəxəssislər 2006-cı ildə sonuncu dəfə Xanlarda olan zaman kilsənin təmiri üçün fevral ayında gələcəklərini söyləyiblər.
2007-ci ildə hansı tarixi abidələrdə əsası təmir işlərinin görüləcəyinə gəldikdə, Ş.Verdiyeva bildirib ki, bununla bağlı Mədəniyyət və Turizm Nazirliyindən sorğu göndərilib: “Sorğuya əsasən biz Xanlar rayonunda təmirə ehtiyacı olan tarixi abidələr haqqında material toplayıb, həmin tarixi abidələrin şəkilləri ilə birlikdə mart ayınadək Mədəniyyət və Turizm Nazirliyinə cavab göndərəcəyik. Biz istərdik ki, bütün tarixi abidələr təmir edilsin. Tarixi abidələr içərisində əsasən Sarıqaya kəndindəki XVI əsrdə inşa edilmiş “Türbə”nin, Zurnabad kəndində yerləşən XII əsr alban abidələrinə aid “Qala” tikilisinin, Çaykənddəki inşa tarixi bilinməyən “Müqəddəs Məryəm” və “Ayndrit” alban məbədlərinin, eləcə də təmirə ehtiyacı olan digər tarixi abidələrin adlarını Mədəniyyət və Turizm Nazirliyinə göndərməyi planlaşdırırıq”. /APA/