Ədəbiyyat

Ana səhifə

Ədəbiyyat

Xalq şairi Qabil I Fəxri Xiyabanda torpağa tapşırılıb

05 aprel 2007 13:20 (UTC +04:00)

APA-nın məlumatına görə, mərasimdə Azərbaycan prezidenti İlham Əliyev də iştirak edib. Matəm mitinqində çıxış edən baş nazirin müavini Elçin Əfəndiyev Azərbaycan ədəbiyyatına böyük itki üz verdiyini deyib: “Azərbaycan poeziyasında təkrarolunmaz şəxsiyyəti və oxucu kütləsi ilə fərqlənən Qabil xalqına pərəstiş edirdi”.
Azərbaycan Yazıçılar Birliyinin sədri, yazıçı Anar şair Qabilin ölümündən təsirləndiyini vurğulayıb: “Çox təəssüf ki, bu gündən sonra Qabil mənim otağlma gəlib yeni şerinin oxumayacaq. Hər zaman öz sadəliyi ilə seçilən Qabil 81 illik ömründə heç kimə əziyyət vermədi və əziyyət vermədən də dünyasını dəyişdi”.
Şairin həyatının son günlərinə qədər sadiq vətəndaş və ədəbiyyat xadimi kimi vətəninə xidmət etdiyini deyən mədəniyyət və turizm naziri Əbülfəs Qarayev onu heç kimin əvəz edə bilməyəcəyini qeyd edib.
Akademik Bəkir Nəbiyev çıxışında xalq şairinin Azərbaycan ədəbiyyatında möhtəşəmliyi ilə seçildiyini bildirib.
Matəm mitinqində xalq şairləri Sabir Rüstəmxanlı, Zəlimxan Yaqub da çıxış edib.
Vida mərasiminin sonunda mərhumun oğlu Mahir İmamverdiyev atasına göstərilən qayğıya görə minnətdarlığını bildirib. Daha sonra xalq şairi Qabil İmamverdiyev I Fəxri Xiyabanda torpağa tapşırılıb.
Qeyd edək ki, Azərbaycan Yazıçılar Birliyinin Ağsaqqallar Şurasının sədri olan Qabil İmamverdiyev kəskin ürək tənəffüzü çatışmazlığından dünyasını dəyişib. Şair son bir ildə ürək çatışmazlığından əziyyət çəkib.
Mərhum 1926-cı ilin avqustun 12-də Bakıda anadan olub. Şair Qabil “Şöhrət” və “İstiqlal” ordenlərinə də layiq görülüb. /APA/