Ədəbiyyat

Ana səhifə

Ədəbiyyat

Azərbaycanın xalq yazıçısı Hüseyn Abbaszadə torpağa tapşırılıb

13 dekabr 2007 12:27 (UTC +04:00)

APA-nın xəbərinə görə, yazıçının dəfn mərasimində Azərbaycanın elm və mədəniyyət xadimləri, tanımış ziyalılar iştirak ediblər. Mədəniyyət və turizm nazirinin müavini Ədalət Vəliyev, Azərbaycan Yazıçılar Birliyinin sədri Anar, ədəbiyyat xadimləri, habelə siyasətçilər də vida mərasiminə qatılıblar. Yazıçının qızı İradə Mingücün APA-ya bildirdiyinə görə, atası kəskin böyrək və beyin qan dövranı çatışmazlığından əziyyət çəkirmiş. Xəstəxanada müalicə olunan Hüseyn Abbaszadənin vəziyyəti normallaşsa da, dekabrın 11-dən-12-nə keçən gecə halı qəflətən pisləşib və onun həyatını xilas etmək mümkün olmayıb. Xalq yazıçısı II Fəxri Xiyabanda torpağa tapşırılıb.
1922-ci il noyabrın 22-də Bakı şəhərində anadan olan Hüseyn Abbaszadə Azərbaycan ədəbiyyatı tarixində irihəcmli nəsr əsərlərinin, o cümlədən 4 roman, 16 povest, 100-ə yaxın hekayənin müəllifi kimi tanınır.
Qeyd edək ki, yazıçı doğum günündən bir az öncə APA-ya açıqlamasında xüsusi təmtəraqları sevmədiyini, bu üzdən də 85 illik yubileyinin təntənə ilə qeyd edilməsinə hazırlaşmadığını bildirmişdi. Çap olunan əsərləri ilə yanaşı, işıq üzü görməyən əlyazmalarının taleyini də gələcək nəsillərin ixtiyarına verdiyini deyən yazıçı arxivini bütünlüklə Salman Mümtaz adına Dövlət Ədəbiyyat və İncəsənət Arxivinə təhvil verdiyini söyləmişdi. /APA/