Bakı. Nicat Mustafayev – APA-Economics. Azərbaycanın aparıcı mobil rabitə operatoru olan «Azercell Telekom» şirkətinin abunəçilərinin sayı son bir ildə 4,8% artıb. «APA-Economics»in məlumatına görə, bu barədə şirkətin 2012-ci ilin yekunlarına dair bu gün keçirdiyi mətbuat konfransında bildirilib.
Tədbirdə qeyd olunub ki, əgər 2011-ci ildə «Azercell»in abunəçilərinin sayı 4,2 mln. təşkil edirdisə, 2012-ci ildə bu göstərici daha 200 min artaraq 4,4 mln-a çatıb.
Tədbirdə çıxış edən şirkətin prezidenti Kiril Qaburiç qeyd edib ki, hesabat ilində «Azercell»in ölkə üzrə quraşdırılmış baza stansiyalarının sayı 2 dəfə artıb. Belə ki, təkcə 2012-ci ildə ölkə üzrə 1 000-ə yaxın yeni baza stansiyası quraşdırılıb.
Həmçinin bildirilib ki, 2012-ci il ərzində şirkət dövlət büdcəsinə 90 mln. manat, fəaliyyət göstərdiyi 16 il ərzində isə ümumilikdə 925 mln. manat vergi ödəyib. Azərbaycanda telekommunikasiyanın inkişafına 100 mln. manat, 16 il ərzində ümumilikdə 1 mlrd. manat sərmayə yatırıb.
Bundan başqa, 2012-ci ildə «Azercell» sosial layihələrin icrasına 1,6 mln. manat vəsait xərcləyib.
K.Qaburiç həmçinin bildirib ki, «Azercell» 2013-cü ilə də çox iddialı başlayıb: «Mobil Nömrə Daşınması Xidmətinə tam olaraq hazır olan «Azercell» bu il ərzində ölkədə telekommunikasiya texnologiyalarının inkişafına sərmayə yatırmaqda davam edəcək və öz şəbəkəsini və müştəri xidmətlərini daha da təkmilləşdirəcək».
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
