Bakı. Kəmalə Quliyeva–APA. Azərbaycanda küçə adları, afişa və reklamlarda Azərbaycan ədəbi dilinin normalarının pozulması hallarına qarşı ciddi tədbirlər görüləcək. APA-nın məlumatına görə, bu, ölkə prezidenti İlham Əliyevin dünən imzaladığı “Azərbaycan dilinin qloballaşma şəraitində zamanın tələblərinə uyğun istifadəsinə və ölkədə dilçiliyin inkişafına dair Dövlət Proqramı”nda nəzərdə tutulub. Proqrama əsasən, 2013-2015-ci illər ərzində AMEA, Mədəniyyət və Turizm Nazirliyi, Əmlak Məsələləri Dövlət Komitəsi, yerli icra hakimiyyəti orqanları və bələdiyyələr tərəfindən bu istiqamətdə zəruri addımlar atılmalıdır.
Yaxın iki il ərzində Azərbaycan dilinin öyrənilməsi və təbliği sahəsində informasiya-kommunikasiya texnologiyalarının tətbiqini gücləndirmək üçün Azərbaycan dilinin dövlət dili kimi ümumi informasiya bazasının yaradılması nəzərdə tutulub. Bazanın yaradılması AMEA, Təhsil və Rabitə və İnformasiya Texnologiyaları nazirlikləri tərəfindən həyata keçiriləcək.
2013-2020-ci illər ərzində AMEA, Təhsil və Rabitə və İnformasiya Texnologiyaları nazirlikləri tərəfindən Azərbaycan dilinin təkmilləşdirilmiş yeni orfoqrafik, izahlı, frazeoloji, terminoloji, tərcümə, ensiklopedik və tezlik elektron lüğətləri hazırlanacaq. Azərbaycan dilində internet resurslarının, elektron və interaktiv dərsliklərin yaradılması istiqamətində fəaliyyət gücləndiriləcək.
AMEA Əlyazmalar İnstitutunda saxlanılan əlyazmalardan istifadəni asanlaşdırmaq məqsədilə “Əlyazmaların elektron kitabxanası” və internet portalı yaradılacaq.
Proqrama əsasən, Standartlaşdırma, Metrologiya və Patent üzrə Dövlət Komitəsi və AMEA tərəfindən 2013-2015-ci illər ərzində beynəlxalq standartlar əsasında milli terminoloji informasiya sistemi yaradılacaq. Həmçinin yaxın 3 il ərzində AMEA, Rabitə və İnformasiya Texnologiyaları Nazirliyi və Müəllif Hüquqları Agentliyi tərəfindən Azərbaycan dilində antiplagiat sistemin yaradılması nəzərdə tutulur.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
