Bakı. Vüsal Nəbiyev – APA-Economics. Nəqliyyat Nazirliyi “Azəryolservis” ASC tərəfindən Ağstafa rayonu ərazisində 4 avtomobil körpüsünün tikintisi işlərinə start verilir.
“Azəryolservis” ASC-dən “APA-Economics”ə verilən məlumata görə, tikinti işləri nəqliyyat vasitələrinin rahat və maneəsiz şəkildə hərəkətini təmin etmək məqsədi ilə həyata keçirilən kompleks tədbirlər çərçivəsində aparılacaq.
Körpülərin Ağstafa-Poylu-Gürcüstan ilə Dövlət sərhədi və Poylu-Düzqışlaq-Qazax avtomobil yollarının üzərində inşası planlaşdırılır. Yeni avtomobil körpüləri Ağstafaçay, Acıdərəçay və Kür çayları, həmçinin dəmir yolu üzərində inşa ediləcək.
Kür çayı üzərində inşa ediləcək körpünün uzunluğu 194 metr, Ağstafaçay üzərində inşası planlaşdırılan körpünün uzunluğu 84 metr, Acıdərəçay üzərindəki körpünün uzunluğu 66 metr, dəmir yolu üzərindəki tikiləcək körpünün isə uzunluğu 34 metr olacaq.
Layihə Asiya İnkişaf Bankının ayırdığı kredit hesabına maliyyələşdirilir. Təqribən bir ay müddətində mobilizasiya işləri başa çatdırılaraq, tikintiyə start verilməsi planlaşdırılır.
Layihənin tikinti müddəti ilkin olaraq 2 il nəzərdə tutulub.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
