Bakı – APA. Macarıstanın baş naziri Viktor Orbanın xanımı Aniko Levai mayın birinci ongünlüyündə Azərbaycanda səfərdə olacaq. Azərbaycanın Macarıstandakı səfirliyindən APA-ya verilən məlumata görə, ilk dəfə gerçəkləşəcək səfər tanışlıq xarakteri daşıyır.
Xanım Levainin redaktorluğu altında artıq bir neçə ildir ki, Budapeştdə "Macar mətbəxi" ("Magyar konyha") adlı populyar jurnal nəşr edilir. Hər sayı maraqla qarşılanan bu nəşr oxucularını təkcə macar deyil, həm də ayrı-ayrı dünya ölkələrinin kulinariya mədəniyyəti ilə də yaxından tanış edir. Bu baxımdan Azərbayana səfərin məqsədlərindən biri də jurnalın son illərdə özünəməxsusluğu, çoxçeşidliliyi və zənginliyi ilə tanınan Azərbaycan mətbəxinə dair xüsusi sayının hazırlanması ilə bağlıdır. Azərbaycanda olduğu günlərdə xanım Aniko Levainin Naxçıvana, Gəncə və Qəbələyə səfərləri, habelə Heydər Əliyev Fondunu ziyarəti planlaşdırılır.
Səfir Vilayət Quliyevlə görüş zamanı xanım Levai son illər Azərbaycanla Macarıstan arasında geniş vüsət alan əlaqələrin, habelə Azərbaycan mədəniyyətinə, mətbəxinə, ölkənin turistik imkanlarına böyük marağın səbirsizliklə gözlədiyi bu səfərin baş tutmasına zəmin yaratdığını xüsusi vurğulayıb. Baş nazirin xanımı Azərbaycanın Macarıstandakı səfirliyinin və "Macarıstan-Azərbaycan dostluq cəmiyyətinin " birgə səyi ilə macar dilində çap olunan üç cildlik "Azərbaycan nağılları" kitabını da yüksək qiymətləndirib və onu gənc həmvətənlərinin ehtiyac duyduğu mənəvi qida kimi dəyərləndirib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
