Bakı. Könül Kamilqızı – APA. Təhsil müəssisələrində çalışan alimlərin istinad indeksli jurnallarda dərc olunan məqalələrinin sayı artıb. Təhsil NAzirliyindən APA-ya verilən xəbərə görə, təhsil müəssisələrində çalışan alimlərin impakt-faktorlu jurnallarda 2011-ci ildə 242 məqaləsi, 2014-cü ildə 300 məqaləsi, 2015-ci ildə isə 604 məqaləsi dərc edilib.
Son illər ölkədə digər beynəlxalq elmi bazalarla yanaşı, dünyada intellektual informasiya üzrə ən iri aparıcı provayder olan "Thomson Reuters" Agentliyinin xidmətlərindən geniş istifadə edilməsi üçün məqsədyönlü işlər aparılır. Təhsil Nazirliyinin təşəbbüsü ilə “Thomson Reuters” şirkəti ilə ötən ilin dekabr ayında əməkdaşlıq haqqında müqavilə imzalanıb. Əməkdaşlıq müqaviləsinə əsasən, Azərbaycanın 40 ali təhsil müəssisəsi Təhsil Nazirliyinin sifarişi əsasında dünyada məşhur elmi istinad indeksi olan “Thomson Reuters Web of Science” platformasına çıxış əldə etmək imkanı qazanıb. “Thomson Reuters” öz arxivi ilə yanaşı, yeni çap olunan jurnalları da Azərbaycan alimlərinin ixtiyarına verir.
Təhsil Nazirliyi Azərbaycanın elmi nailiyyətlərinin beynəlxalq miqyasda tanınması, ali təhsil müəssisələrinin elmi-pedaqoji əməkdaşlarının elmi fəaliyyətinin və nəşr aktivliyinin daha da genişləndirilməsi məqsədilə “Thomson Reuters” bazasında olan jurnallarda çap olunmuş elmi əsərlərə görə mükafatlandırma üzrə müsabiqə keçirəcək. Müəlliflərin elmi fəaliyyətinin keyfiyyət göstəricisi Təhsil Nazirliyi tərəfindən hazırlanıb təsdiq edilmiş xüsusi metodika ilə müəyyənləşdiriləcək. Müsabiqə 5 elmi istiqamət qrupu–riyaziyyat və texniki elmlər, fizika, kimya, biologiya, humanitar elmlər, iqtisadiyyat və idarəetmə, tibb elmləri üzrə keçiriləcək. Müsabiqə ildə 1 dəfə olmaqla, təqvim ilinin sonunda təşkil ediləcək və bununla bağlı Təhsil Nazirliyinin saytında ətraflı məlumat veriləcək.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
