Bakı-APA. Liviya sahillərində miqrantları daşıyan qayıqlar saxlanılıb.
APA-nın RİA Novosti agentliyinə istinadən verdiyi məlumata görə, sahil mühafizə xidmətinin əməkdaşları göyərtəsində 850-yə yaxın miqrantın olduğu hava ilə doldurulan qayıqları Sabrata şəhəri yaxınlığında saxlayıb.
Avropaya yollanmaq niyyətində olan miqrantlar bir neçə Afrika ölkələrinin vətəndaşları olub. Onlardan 69-u qadın, 11-i isə uşaqlardır.
Beynəlxalq Miqrasiya Təşkilatının hesablamalarına görə, ilin əvvəlindən dəniz yolu ilə Avropaya gələn miqrantların sayı 180 min nəfəri keçib. Təşkilatın bildirdiyinə görə, 1 232 insan yolda ölüb və yaxud itkin düşüb.