Mədəniyyət siyasəti

Ana səhifə

Mədəniyyət siyasəti

Bolqarıstanda Azərbaycan Mədəniyyət Günləri keçiriləcək

05 iyul 2012 16:53 (UTC +04:00)

Bakı. Viktoriya Dementyeva-APA. Bu gün Sofiyada Azərbaycan və Bolqarıstan mədəniyyət nazirlərinin görüşü keçirilib. APA-nın məlumatına görə, görüşdə Azərbaycanda Bolqarıstan Mədəniyyət Günlərinin, Bolqarıstanda isə Azərbaycan Mədəniyyət Günlərinin keçirilməsi barədə qərar qəbul olunub. Bu günlər çərçivəsində sərgilərin açılması, Kino Həftəsinin keçirilməsi və sair nəzərdə tutulur. Nazirlər Əbülfəs Qarayev və Vecdi Rəşidov kinematoqrafiya sahəsində əməkdaşlığı daha da genişləndirmək barədə razılaşma əldə ediblər.

Əbülfəs Qarayev bolqar həmkarını bu ilin dekabrında Bakıda açılacaq Xalça Muzeyinin açılış mərasiminə və gələn il 28 may – 1 iyun tarixində paytaxtımızda keçiriləcək Mədəniyyətlərarası Dialoq Forumuna dəvət edib.

Qeyd edək ki, mədəniyyət və turizm naziri Əbülfəs Qarayevin Bolqarıstana iki günlük səfəri sabah başa çatacaq.