Bakı. Anaxanım Hidayətova - APA. Bakıda keçirilən TÜRKSOY-a üzv ölkələrin UNESCO üzrə Milli Komissiya və Komitələrinin ənənəvi 5-ci iclasının açılış mərasimində UNESCO-nun baş direktoru İrina Bokovanın tədbir iştirakçılarına müraciəti oxunub.
APA-nın xəbərinə görə, müraciəti UNESCO-nun xarici əlaqələr və ictimaiyyət sektorunun üzv dövlətlər və tərəfdaşlar idarəsinin rəhbəri Genc Seiti təqdim edib.
Müraciətdə Azərbaycan-UNESCO münasibətlərinin geniş şəkildə inkişafı, bu əlaqələrdə Heydər Əliyev Fondunun fəaliyyəti xüsusilə qeyd olunub. Vurğulanıb ki, Azərbaycanın bu möhtəşəm tədbirə ev sahibliyi etməsi təqdirəlayiqdir: “Bu iclas müvafiq komissiyalar arasında mədəniyyət, elm, təhsil sahəsində vacib addımların atılması üçün daha bir fürsətdir”.
Daha sonra TÜRKSOY-un baş katibi Düsein Kaseinov çıxış edərək, bu tədbirin Bakıda keçirilməsindən məmnun olduğunu bildirib. Azərbaycanın bütün beynəlxalq tədbirlərə uğurla ev sahibliyi etdiyini deyən D.Kaseinovun sözlərinə görə, TÜRKSOY-un fəaliyyəti UNESCO-nun ideya istiqamətlərinə uyğundur və prezident İlham Əliyev tərəfindən də yüksək qiymətləndirilir.
Sonra TÜRKSOY-un baş katibi tərəfindən Azərbaycan tərəfə hədiyyələr təqdim olunub.
Qeyd edək ki, iki gün davam edəcək tədbir çərçivəsində mədəni və təbii irs, qeyri-maddi mədəni irs, təhsil və dünya yaddaşı proqramı üzrə dörd dəyirmi masa keçiriləcək.