Futbol

Ana səhifə

Futbol

Tale Heydərov: “Futbolun inkişafı üçün “Qəbələ” kimi klubların üzərinə böyük məsuliyyət düşür” - FOTO

Tale Heydərov: “Futbolun inkişafı üçün “Qəbələ” kimi klubların üzərinə böyük məsuliyyət düşür” - <font color=red>FOTO</font>

31 may 2012 15:26 (UTC +04:00)

Apasport.az saytının məlumatına görə, əvvəlcə turnir iştirakçıları meydançaya daxil olublar.

Sonra söz “Qəbələ” klubunun prezidenti Tale Heydərova verilib. Heydərov əvvəlcə qonaqlara iştirakla əlaqədar təşəkkürünü bildirib.

O, hər bir idman növünə dövlət qayğısının çox vacib olduğunu və bu faktorun Azərbaycanda da mövcudluğundan çox şad olduqlarını vurğulayıb: “Bunun göstəricisi kimi böyük turnirlərin Azərbaycanda keçirilməsini qeyd edə bilərəm. Amma idmanın, o cümlədən futbolun inkişafı üçün bizim kimi klubların üzərinə böyük məsuliyyət düşür. Uşaq futbolu futbolun inkişafı üçün böyük amildir. Bunu nəzərə alaraq, “Qəbələ” yarandığı vaxtdan uzunmüddətli plan və strategiya müəyyənləşdirib.

Uşaq futboluna diqqət göstərərək, Azərbaycanda futbol akademiyası yaradan ilk klub olmuşuq. Biz də bu gün 15 yaşadək akademiyalar arasında turnir təşkil etmişik. “Qəbələ”nin uşaq futbolçuları böyük uğurlar əldə ediblər, müxtəlif yaşlılar arasında Azərbaycan çempionu olublar.

Dünyanın müxtəlif ölkələrində - İngiltərə, Latviya və Türkiyədə layiqincə təmsil edərək, yeniliklər əldə ediblər və məşqçilərimiz həmin yenilikləri Azərbaycana gətiriblər. Amma bu turniri biz “Qəbələ” klubundakı gözəl meydançalar olmadan keçirə bilməzdik. Klubumuz infrastruktura böyük diqqət göstərir və hazırda akademiyamızın bünövrəsi qoyulub. Ümidvarıq ki, gələn il akademiyamızın meydançası 2013-cü ilin ortalarında, əsas stadionumuz isə 2014-cü ildə istifadəyə veriləcək”.

“Qəbələ”nin özünəməxsus fəlsəfəsinin olduğunu deyən Heydərov bildirib ki, qələbələri düzgün, gözəl şəkildə əldə etmək niyyətindədirlər: “Burada Azərbaycan klublarından “Qarabağ” da iştirak edir. Bu da Azərbaycanda inkişaf üçün rəqabətin olmasını nəzərdə tutmağımızdan irəli gəlir. Bu tədbirin keçirilməsində göstərdiyi dəstəyə görə AFFA-ya minnətdarlıq edirəm. Ümidvaram ki, bu turnir ənənə halını alacaq və sizin kimi komandaları burada qəbul edəcəyik”.

Qeyd edək ki, “Qəbələ Kuboku-2012”də 8 komanda iştirak edir. Təşkilatçı “Qəbələ” ilə yanaşı, Azərbaycanı “Qarabağ” təmsil edir. Eyni zamanda İspaniyanın “Vilyarreal” və “Levante”, Türkiyənin “Qalatasaray”, Hollandiyanın “Feyenoord”, Danimarkanın “Bröndbü” və Serbiya milli komandası mübarizə aparır. Yarışa iyunun 3-də yekun vurulacaq.