Futbol

Ana səhifə

Futbol

Mahmud Qurbanov “Tərəqqi” klubunun baş məşqçisi təyin olunub

05 iyun 2012 14:34 (UTC +04:00)

Bakı – APA. Azərbaycanın ən titullu futbolçusu Mahmud Qurbanov fəaliyyətini yenidən Gəncədə davam etdirəcək. Apasport.az saytının məlumatına görə, futbolçu karyerasını 39 yaşında “Sumqayıt” klubunda başa vuran yarımmüdafiəçi doğma şəhərə məşqçi kimi qayıdır.

Belə ki, Qurbanov Gəncənin “Tərəqqi” klubunun baş məşqçi vəzifəsinə təyin olunub. Bu məlumatı “Tərəqqi”nin prezidenti Musa Abdullayev də təsdiqləyib: “Mahmud çox peşəkar bir futbolçu olub. İnanırıq ki, bir gəncəli kimi Mahmud bütün bilik və bacarığını komandamızın daha da yaxşı futbol oynamasına, yüksək yerləri tutaraq növbəti mövsümdə Premyer Liqaya vəsiqə qazanmasına sərf edəcək. Uzun illərdən sonra onun doğma şəhərinin komandasına qayıtması münasibəti ilə təbrik edirəm. Qurbanovla hələlik 1 illik razılaşma əldə olunub. Əgər o, özünü əməli işi ilə doğrultsa onda müqaviləyə yenidən baxılacaq”.

Qeyd edək ki, 1994/95, 1997/98, 1998/99 mövsümlərində “Kəpəz”, 1996/97, 2003/04 və 2004/05 mövsümlərində “Neftçi”, 1999/2000 və 2000/01 mövsümlərində “Şəmkir”, 2006/07 mövsümündə “Xəzər Lənkəran”, 2007/08 mövsümündə “İnter”, 2008/09 mövsümündə “Bakı” ilə Azərbaycan çempionu olub. 11 qat Azərbaycan çempionu sonuncu dəfə 1999-cü ildə Gəncə təmsilçisində çıxış edib.