Hadisə

Ana səhifə

Hadisə

Bakı şəhər Prokurorluğu “Yeni Müsavat” qəzetinə xəbərdarlıq edib

25 sentyabr 2008 16:30 (UTC +04:00)

Bakı-APA. Bakı şəhər Prokurorluğu “Yeni Müsavat” qəzetinin 24 sentyabr tarixli sayında dərc olunan “Bakıda terror şayiəsi” sərlövhəli məqalə ilə bağlı açıqlama yayıb. Prokurorluqdan APA-ya verilən məlumata görə, qəzetdə dərc olunan məqalədə 23 sentyabr tarixində metronun “28 May” stansiyasında partlayışın baş verdiyi göstərilsə də, bu məlumatın şayiə olduğu aydınlaşıb. Bildirilib ki, sentyabrın 24-də Bakı şəhər Prokurorluğu tərəfindən qəzetdə göstərilən məlumatın mənbəyini müəyyən edilməsi məqsədi ilə müvafiq araşdırma aparılıb. Eyni zamanda yazı ilə bağlı “Yeni Müsavat” qəzetinin baş redaktorunun birinci müavini Azər Ayxan və qəzetin müxbiri Məhəbbət Orucov şəhər Prokurorluğuna dəvət ediliblər. Məlumata görə, bu gün Bakı şəhər Prokurorluğunda qəzetin əməkdaşları ilə söhbət aparılıb: “Söhbət zamanı qəzetin əməkdaşları bildiriblər ki, yazı ilə bağlı onlarda heç bir mötəbər məlumat olmayıb və tanımadıqları şəxslərdən bu barədə eşitdikləri xəbərləri yazıblar”.

Qeyd olunub ki, Bakı Şəhər Prokurorluğu sentyabrın 23-də metronun “28 May” stansiyasında heç bir partlayış baş vermədiyini bildirməklə “Yeni Müsavat” qəzetinin baş redaktorunun birinci müavini Azər Ayxana qanun pozuntularından çəkindirmək məqsədi ilə rəsmi xəbərdarlıq edib: “Onların nəzərinə çatdırılıb ki, əhali arasında terrorçuluq aktına dair bilə-bilə yalan şayiələrin yayılması yolverilməzdir və cinayət məsuliyyətinə səbəb olur. Kütləvi informasiya vasitələrində bu cür əsassız, yoxlanılmamış məlumatın çap edilməsi ictimaiyyəti çaşdırmaq, vətəndaşlar arasında gərginlik, vahimə və qorxu hissinin yaradılmasına, insanların rahatlığının pozulmasına, digər tərəfdən hüquq-mühafizə və əlaqədar təşkilatların qüvvəsinin lazımsız yerə sərf olunmasına yönələn hərəkətlər olmaqla terrorçuluq barədə bilə-bilə yalan məlumat vermək kimi qiymətləndirilərək Azərbaycan Respublikası Cinayət Məcəlləsinin 216-cı maddəsi ilə cinayət məsuliyyəti yaradır”.

“Yeni Müsavat” qəzetinin baş redaktorunun birinci müavini Azər Ayxan APA-ya bildirib ki,
prokurorluqda onlardan dərc olunan məlumatın mənbəyini soruşublar: “Biz isə bildirdik ki, yazı müxbirin ictimaiyyət arasında eşitdikləri əsasında yazılıb”.
A. Ayxan deyib ki, prokurorluqda onlara xəbərdarlıq olunsa da, həmin xəbərdarlığı yazılı şəkildə təqdim etməyiblər. Belə xəbərdarlığa etiraz etdiyini bildirən A. Ayxan deyib ki, bu, mətbuata qarşı təzyiqdir: “Onu da qeyd edim ki, prokurorluq orqanının belə bir məsələyə reaksiya verməsi təqdir olunmalıdır”.