Hadisə

Ana səhifə

Hadisə

Sabunçu rayonunda taksi sürücüsü qarət edilib

18 oktyabr 2008 07:53 (UTC +04:00)

Bakı. Hafiz Heydərov - APA. Bakının Sabunçu rayonunda taksi sürücüsü qarət edilib. Sabunçu Rayon Polis İdarəsindən (RPİ) APA-ya verilən məlumata görə, hadisə M. Əliyev küçəsi 9 ünvanında baş verib. Sabunçu sakini, 1979-cu il təvəllüdlü Sabir Hüseyn oğlu Musayevin taksi kimi istifadə etdiyi “VAZ-2107” markalı, 10 LB 797 dövlət nömrə nişanlı maşına Balaxanıya getmək niyyəti ilə üç naməlum şəxs əyləşib.

Onlar taksi sürücüsünə Balaxanı qəsəbəsində yerləşən 3 saylı poçtun yanında düşəcəklərini bildiriblər. Yolda qarşıda əyləşən sərnişin sürücünün boğazına bıçaq dirəyərək onun pullarını alıb yerindən qaçıb. Maraqlıdır ki, digər sərnişinlər maşında qalıblar.

Sabunçu RPİ-nin 12-ci Polis Bölməsinin əməkdaşlarının keçirdiyi əməliyyat-axtarış tədbirləri nəticəsində quldurluq əməlini törətmiş Buzovna qəsəbə sakini, 1978-ci il təvəllüdlü Ramin Muxtar oğlu Atakişiyev saxlanılıb.

Onun barəsində Cinayət Məcəlləsinin 181-ci (quldurluq) maddəsi ilə cinayət işi başlanılıb, araşdırma aparılır.