Hadisə

Ana səhifə

Hadisə

Mingəçevir sakinini döyməkdə təqsirləndirilən Axund: “Cinayətkaramsa, məni niyə tutmurlar?”

21 oktyabr 2008 10:56 (UTC +04:00)

APA-nın məlumatına görə, bu sözləri Qafqaz Müsəlmanları İdarəsinin Şirvan bölgəsi üzrə Qazısı, Mingəçevir şəhərinin Axundu Hacı Xanəli Babayev bu gün sözügedən idarənin sədr müavini Hacı Salman Musayevin keçirdiyi mətbuat konfransında bildirib. X. Babayev qonşusu Ramiz Süleymanovu döyməsi və onun barəsində Mingəçevir Şəhər Polis İdarəsində cinayət işinin başlanması barədə məlumatların həqiqətə uyğun olmadığını bəyan edib.

Hacı Salman Musayev də məsələyə münasibət bildirib: “Onun övladının altı yaşı var. Altı yaşlı uşaq necə qonşunun çənəsini sındıra bilər? Bəzən adi şeyi böyük bir işə çevirirlər. Bunlar hamısı boş-boş şeylərdir. Bir adam iş görürsə, həmişə onun haqqında danışırlar”.

Qeyd edək ki, Mingəçevirdə suvaqçı işləyən şəhər sakini Süleymanov Ramiz Məhəmməd oğlunu döyərək ona xəsarət yetirməkdə təqsirləndirilən Hacı Xanəli Babayev barəsində Cinayət Məcəlləsinin 127.1 maddəsi (sağlamlığa qəsdən ağır zərər yetirmək) ilə cinayət işi başlanıb. Mingəçevir şəhər Polis Şöbəsinin istintaq bölməsindən APA-ya bildirib ki, faktı araşdıran təhqiqat qrupu hadisənin baş vermə səbəbləri barədə faktlar toplayıb, şahid ifadələri alınıb. Hazırda araşdırma davam edir.