Hadisə

Ana səhifə

Hadisə

Ədliyyə Nazirliyi yanında Penitensiar Sistemə Nəzarət İctimai Komitəsinin üzvlərinin adları məlum olub

24 noyabr 2008 13:06 (UTC +04:00)

Bakı-APA. Ədliyyə Nazirliyi yanında Penitensiar Sistemə Nəzarət İctimai Komitəsinin yeni tərkibi məlumdur. Bu barədə APA-ya açıqlamasında qurumun üzvü Konstitusiya Araşdırmaları Fondunun rəhbəri Əliməmməd Nuriyev bildirib. Onun sözlərinə görə, qurumun əvvəlki tərkibində olan Hüquq Müdafiə Federasiyasının sədri Eldar Zeynalovu yeni tərkibdə adıçəkilən qurumun üzvü, hüquq müdafiəçisi Zəlihə Tahirova əvəz edəcək. İctimai Komitənin əvvəlki tərkibində olan bir vakant yeri isə vəkil İradə Cavadova tutub.

İctimai Komitənin əvvəlki tərkibində fəaliyyət göstərən hüquq müdafiəçiləri Səidə Qocamanlı, Çingiz Qənizadə, Elçin Behbudov, Elmira Ələkbərova, Sahib Məmmədov, Səadət Bənənyarlı, Gənc Hüquqşünaslar Birliyinin sədri Elmari Məmişov, “Azadlıqdan məhrumetmə yerlərinin müşahidəsi” İctimai Birliyinin sədri Kamil Səlimov, Konstitutusiya Araşdırmaları Fondunun rəhbəri Əliməmməd Nuriyev bu dəfə də qurumun üzvü seçiliblər.
Ədliyyə Nazirliyindən APA-ya verilən məlumatda isə bildirilib ki, İctimai Komitənin yeni tərkibi qurumun Ədliyyə Nazirliyində keçiriləcək ilk toplantısında açıqlanacaq. Toplantının bu ayın sonlarında keçirilməsi gözlənilir.

Qeyd edək ki, Ədliyyə Nazirliyi yanında Penitensiar Sistemə Nəzarət İctimai Komitəsi 2006-cı ildən fəaliyyət göstərir. Qəbul edilən qaydaya əsasən, komitənin tərkibi bir il müddətinə seçilir. Bu, komitənin üçüncü tərkibidir. Əvvəlki tərkibin səlahiyyət müddəti sentyabr ayında başa çatıb. Qurumun ilk tərkibinin 9, ikinci tərkibin 10 üzvü olub. Bu dəfə isə komitə üzvlərinin sayı nəzərdə tutulan həddə - 11 nəfərə çatıb.