Hadisə

Ana səhifə

Hadisə

2008-ci ilin ən səsli-küylü cinayətləri: “Koza Nostra”nın süqutu, avstriyalı manyakın həbsi, “Papa”nın ölümü... - FOTO

2008-ci ilin ən səsli-küylü cinayətləri: “Koza Nostra”nın süqutu, avstriyalı manyakın həbsi, “Papa”nın ölümü... - <font color=red>FOTO</font>

06 yanvar 2009 09:52 (UTC +04:00)

Bakı-APA. 2008-ci il səs-küylü cinayət hadisələri ilə zəngin olub. APA-nın “Lenta.ru” saytına istinadən yaydığı məlumata görə, ötən il inanılmaz cinayətlər törətmiş manyakların həbsi, sensasion qətllər, yüzlərlə mafiya rəhbərinin saxlanması, məktəblərdə baş verən atışmalar və sair bu kimi kriminal hadisələrlə yadda qalıb. Ötən ilin ən sensasion cinayətlərindən biri sözsüz ki, avstriyalı manyakın, 73 yaşlı Yozef Fritslin həbsidir. Qızını 24 il evində hazırladığı xüsusi sığınacaqda saxlayan Fritsl onu mütəmadi olaraq zorlayıb və bu iyrənc cinsi münasibətlərdən 7 uşaq dünyaya gəlib. Uşaqlardan biri doğuş zamanı ölüb, üçü anası ilə birlikdə zirzəmidə yaşayıb, digər 3 uşaq isə “babası” ilə birlikdə adi həyat sürüb. 42 yaşında sığınacaqdan çıxmağa müvəffəq olan Elizabet polisə müraciət edib və atası həbs olunub. İstintaqa ifadə verən Fritsl başqa cinayətlərini də etiraf edib. O, yaşlı anasını ölənə kimi qaranlıq çardaqda zəncirə vuraraq saxladığını bildirib. Fritslin məhkəməsi fevral ayında başlayacaq.

Ötən ilin mayında Fransa məhkəməsi daha bir manyakı ömürlük həbs cəzasına məhkum edib. “Ardenn meşəbəyisi” adlandırılan 65 yaşlı Mişel Furnye 1987-2001-ci illərdə 13-22 yaşlı doqquz qızı oğurlamaqda, zorlamaqda və qətlə yetirməkdə ittiham olunur. Onun daha 3 qızı qətlə yetirdiyi ehtimal olunur, “Ardenn meşəbəyisi” bütün cinayətlərini Fransa-Belçika sərhədinə yaxın ərazidə törədib. Mişel Furnye ilə birlikdə onun üçüncü həyat yoldaşı Monik Olivye də ömürlük həbs cəzasına məhkum edilib. O, qızları tora salmaqda ərinə kömək etməkdə ittiham olunub. Mişel Furnyeni pedofil kimi məhkum ediblər, lakin o məhkəmədə bunun əksini sübuta yetirib və yalnız bakirə qızları zorladığını bildirib.

Ötən ilin fevralında “İspviç içalatyeyəni” kimi tanınan Stiv Rayta da hökm oxunub. O, 2006-cı ildə 5 fahişəni qətlə yetirməkdə ittiham olunub. Qızların cəsədləri İspviç şəhəri yaxınlığında tapılıb, onlardan birinin hamilə olduğu müəyyənləşib.

2008-ci ilin ən səsli-küylü cinayətlərindən birinə Finlandiya “ev sahibliyi” edib. Ölkənin Kauxayoki şəhərində ikinci kurs tələbəsi, 23 yaşlı Matti Saari instituta girərək sağa-sola kortəbii atəş açıb, nəticədə 9 tələbə və müəllim ölüb. Daha sonra benzin tökərək auditoriyanı yandıran cinayətkar sonda intihar edib. Matti Saari intihardan əvvəl kiçik bir kağıza son sözlərini yazıb: “Mən həmişə maksimum daha çox insan öldürmək istəyirdim”.

Buna bənzər cinayət ABŞ-da da qeydə alınıb. 60 yaşlı Elbern Bleyk Wendy’s qəlyanaltısına girərək müştərilərə atəş açmağa başlayıb. Atəş nəticəsində 1 nəfər ölüb, 3 nəfər yaralanıb. Mayda isə Kaliforniya sakini analoji cinayəti kilsədə törədib. Kilsəyə gələnlərə atəş açan sakin üç nəfəri qətlə yetirib.

Tokioda isə Tomoxiro Kato adlı oğlan yük maşınını əhalinin sıx toplaşdığı yerə sürərək çoxlu sayda insanı əzib. Daha sonra maşından düşən Kato 7 nəfəri bıçaqla doğrayıb. Cinayəti törətməzdən əvvəl öz şəxsi internet bloqunda maksimum sayda insan qətlə edəcəyini yazan Kato polisə əməlinin səbəbini belə açıqlayıb: “Mən bu dünyadan bezmişəm”.

2008-ci ildə bütün dünyada mütəşəkkil cinayətkar qruplaşmalara bir neçə əhəmiyyətli zərbələr endirilib. 2006-cı ildə Kent qraflığında Securitas beynəlxalq mühafizə şirkətinə basqın edərək 53 milyon funt sterlinq oğurlamağı bacaran cinayətkarlara ötən il hökm oxunub. Cinayətkarlardan 4 nəfəri, 30 il, biri isə 20 il müddətinə azadlıqdan məhrum edilib, oğurlanan pulun isə yalnız 21 milyon funt sterlinqini geri qaytarmaq mümkün olub.

Ötən il Almaniyanın Duysburq şəhərində iki italyan mafiyası arasında başlanan açıq müharibə çoxsaylı həbslərlə müşayiət olunub. Nəticədə “Ndranqeta” mafiyasının 68 yaşlı rəhbəri Cüzeppe Nirta, daha sonra mafiya bosslarından digəri – Paolo Nirta həbs olunub. Polis həmçinin Nirta klanının düşməni, Pelle-Vottari ailəsinin başçısı, nüfuzlu mafiozi Antonio Pelleni də həbs edib.

2008-ci il həmçinin məşhur “Koza Nostra” klanının süqutu ilə yadda qalıb. Ötən il Siciliya mafiyasına ağır zərbə vurulub. Fevralın əvvəllərində ABŞ və İtaliya polisi “Köhnə körpü” adı altında birgə əməliyyat keçiriblər. Əməliyyatın əsas məqsədi Avropa və ABŞ-dakı Siciliya mafiyaları arasında əlaqəni bərpa etmək və dünyanın ən böyük narkotik maddə kanallarından birini bağlamaq olub. Polis Nyu-Yorkda “Koza Nostra”nın 80 üzvünü həbs edib, Siciliyada da çoxlu sayda klan üzvü həbs olunub. Bununla da “Koza Nostra”nın – Qambinonun varlığına son qoyulub.

Nəhayət, 2008-ci ildə kriminal aləm daha bir itki ilə üzləşib. “Koza Nostra”nın ən nüfuzlu siması, “Papa” ləqəbli Mikele Qreko 83 yaşında vəfat edib. O, Siciliya mafiyası Komissiyasının sədri olub, “Papa” ləqəbini isə müxtəlif klanlar arasında çoxsaylı münaqişələri sülh yolu ilə həll etdiyinə görə alıb. Ömrünün son 22 ilini həbsxanada keçirən “Papa” azadlığa çıxmadan dünyadan köçüb.

Yola saldığımız il həmçinin rus mafiyası üçün də ağır il olub. İyunda İspaniya polisi rus mafiyasının 20-dən artıq üzvünü həbs edib. Həbs olunan şəxslərin hamısı “Tambov” cinayətkar qruplaşmasının üzvləridir. Həbs olunanlar arasında “Tambov” qruplaşmasının ən azı 4 lideri, o cümlədən mafiya başçısı “Vitalik” də olub. Saxlanan şəxslər çirkli pulların yuyulması, silah qaçaqmalçılığı və sifarişli qətllər törətməkdə ittiham olunurlar.

Noyabrda isə Münhendə rus mafiyasının Bavariyadakı işlərini idarə edən Tiqran adlı şəxsin və iki əlaltısının məhkəməsi başlayıb. Adı çəkilən şəxs 200-ə yaxın cinayət faktında, o cümlədən dələduzluq, narkotik maddələr alveri və çirkli pulların yuyulmasında ittiham olunurlar. İstintaq materiallarına görə Bavariya ərazisində bütün narkotik maddələr ticarəti Tiqranın nəzarətində olub. Tiqran həmçinin rus mafiyasının xarici ölkələrdəki işlərinə məsul olan “Timoxa” ləqəbli liderinin varisi sayılır. “Timoxa” 2001-ci ildə Münhen məhkəməsi tərəfindən ömürlük həbs cəzasına məhkum edilib, daha sonra Rusiyaya ekstradisiya olunub.

Nəhayət, ötən ilin ən qalmaqallı məhkəmə proseslərindən biri Tailandda həbs olunmuş rusiyalı sahibkar Viktor But üzərində qurulub. Amerikalılar Viktor Butu dünyada qeyri-leqal silah ticarəti işinin rəhbəri hesab edirlər. ABŞ onu amerikan zabitlərinin qətlə yetirməkdə, “Yer-Hava” tipli raketlərin alqı-satqısında, beynəlxalq terror təşkilatlarının silahla təmin etmıkdə suçlandırır.

Ötən ilin ən səsli-küylü cinayətləri sırasında ABŞ-ın “KATV” telekanalının aparıcısı Enn Preslinin və “Oskar” mükafatı laureatı Cenifer Hadsonun qətlini, Parisdə məşhur “Harry Winston” zərgər salonunun qarət olunmasını da qeyd etmək olar. Sonuncu hadisə zamanı oğrular zərgərlik mağazasından 80 milyon avro dəyərində zinət əşyaları aparmağa müvəffəq olublar. Və sair və ilaxır. Yuxarıda qeyd olunanlar 2008-ci ildə törədilən cinayətlərin heç də hamısı deyil. Təəssüf!