Hadisə

Ana səhifə

Hadisə

Respublika Prokurorluğu və Fövqəladə Hallar Nazirliyi “Sintezkauçuk” zavodunda baş verən partlayışla əlaqədar birgə məlumat yayıb

08 yanvar 2007 12:56 (UTC +04:00)

APA-nın məlumatına görə, Respublika Prokurorluğu və Fövqəladə Hallar Nazirliyinin yaydığı məlumatda qeyd olunub ki, İ. Balakişiyev CM-nin 314.2-ci (ehtiyatsızlıqdan zərərçəkmiş şəxsin ölümünə və digər ağır nəticələrə səbəb olan səhlənkarlıq), sex rəisi İxtiyar Şahverdiyev və Mətləb Şahmuradov isə CM-nin 162.2-ci (ehtiyatsızlıqdan insan ölümünə səbəb olan əmək mühafizəsi qaydalarını pozma) və 223.2-ci (ehtiyatsızlıqdan zərərçəkmiş şəxsin ölümünə və digər ağır nəticələrə səbəb olan partlayış təhlükəli obyektlərdə təhlükəsizlik qaydalarını pozma) maddələri ilə təqsirləndirilən şəxs qismində məsuliyyətə cəlb olunublar. İstintaqla müəyyən edilib ki, “Azərkımya” Dövlət Şirkətinin tabeçiliyində olan və keçmiş SSRİ dövründə istifadəyə verilmiş zavodların sexlərində mövcud olan qurğular, cihazlar, boru xətləri, aparatlar və diğər avadanlıqlar uzun müddət istismar olunduqlarından baş verə biləcək qəza hallarının qarşısını almaq məqsədilə müvafiq tədbirlər görülməsi üçün Fövqəladə Hallar Nazirliyi Baş Dövlət Yanğın Təhlükəsizliyi İdarəsinin Sumqayıt Şəhər İdarəsi tərəfindən Azərkımya” Dövlət Şirkətinə, onun tabeçiliyində olan zavodlara, o cümlədən “Sintezkauçuk” zavodunun rəhbərliyinə rəsmi məktublar göndərilib. Lakin, 2006-cı ilin yanvar ayından zavodun baş mühəndisi və direktor əvəzi vəzifəsində işləyən İxtiyar Balakişiyev öz xidməti vəzifələrinin icrasına səhlənkar yanaşaraq müvafiq tədbirlər görməyib, zavodun sexləri və digər qurğularında aparılan texnoloji proseslər zamanı tabeçiliyində olan mühəndis-texniki işçilər və fəhlələr tərəfindən əməyin mühafizəsi və texniki təhlükəsizlik qaydalarına ciddi riayət edilməsinə lazımi tələbkarlıq göstərməyib.
İstintaqla müəyyən edilib ki, zavodda təkcə 2006-cı ildə bu hadisədən başqa texniki təhlükəsizlik və ya əmək mühafizəsi qaydalarının pozulması nəticəsində 1 nəfərin ölümü, 2 nəfərin isə ağır zərər alması ilə nəticələnən daha 2 hadisə baş verib. Həmin hadisələrlə əlaqədar Sumqayıt şəhər prokurorluğu tərəfindən Cinayət Məcəlləsinin 162-ci maddəsi ilə cinayət işi başlanaraq, təqsirləndirilən şəxslər məhkəmə məsuliyyətinə cəlb olunub. Qanun pozuntularının səbəblərinin aradan qaldırılması üçün müəssisəyə təqdimatlar göndərilsə də, zavod rəhbərliyi tərəfindən heç bir nəticə çıxarılmayıb, baş verə biləcək qəzaların qarşısının alınması təmin edilməyib, nəticədə çoxsaylı insan tələfatı ilə nəticələnən daha bir ağır hadisə törədilib. Belə ki, dekabrın 29-da zavodun yüksək partlayış-yanğın təhlükəli Yeni Butadien sexində ikinci iş növbəsi zamanı birinci korpusda mərkəzdənqaçma nasosunun qəflətən dayanması və xammalın verilməsinin kəsilməsi barədə idarəetmə mərkəzində nəzarət ölçü cihazlarında siqnal lampası yanıb. Həmin vaxt idarəetmə mərkəzində olan sex rəisi İxtiyar Şahverdiyev və növbə rəisi Mətləb Şahmuradov sex və növbə rəisinin vəzifələri haqqında Təlimatların nasazlığı korpusa xidmət edən maşinistin təhlükəsizlik texnikası və partlayış təhlükəsizliyi qaydalarına riayət etməklə aradan qaldırıb-qaldırmamağını yoxlamaq və təmin etmək barədə tələblərini və sexin iş rejimi qaydalarını kobud surətdə pozaraq ikinci korpusa xidmət edən maşinist Şükufə Mustafayevanı öz əsas iş yerindən ayırıb maşinist Samirə Şıxəliyevaya ehtiyata dayanmış ikinci nasosu işə salmağı bildirməkdən ötrü birinci korpusa göndərib. Samirə Şıxəliyeva ehtiyat nasosu işə saldıqdan sonra çıxış xəttinin siyirməsi acılana qədər əmələ gəlmiş yüksək təzyiq borunun bir hissəsini dağıdaraq bir necə şəxsin ölümü ilə nəticələnən güclü partlayışa səbəb olub. Məlumatda bildirilir ki, sex rəisi İxtiyar Şahverdiyev və növbə rəisi Mətləb Şahmuradov əməyin mühafizəsi qaydalarını da pozub, ciddi zərurət olmadan növbə ərzində idarəetmə mərkəzində nəzarət-ölçü cihazlarına xidmət etməli olduqları halda Qafur Əliyev və Əntiqə Babayevanı sexə göndəriblər. Hazırda cinayət işi üzrə ibtidai istintaq davam edir. Eyni zamanda baş vermiş hadisə ilə əlaqədar Fövqəladə Hallar Nazirliyi və Əmək və Əhalinin Sosial Müdafiəsi Nazirliyinin Dövlət Əmək Müfəttişliyinin mütəxəssisləri tərəfindən kompleks yoxlama həyata keçirilir. Qeyd edək ki, partlayış zamanı zavodun işçiləri Samırə Şıxəliyeva və Şükufə Mustafayeva hadisə yerində ölüb, Qafur Əliyev, Əntiqə Babayeva, Fikrət Həsənov və Salam Əhmədov agır dərəcəli yanıq xəsarətləri alaraq xəstəxanaya yerləşdiriliblər. Qafur Əliyev yanvarın 1-də, Fikrət Həsənov isə yanvarın 6-da xəstəxanada vəfat ediblər. /APA/