Hadisə

Ana səhifə

Hadisə

ARDNŞ-in ABƏŞ, “BP-Azərbaycan”, “BOSS Shelf” və “McDermott” şirkətləri ilə apardığı danışıqlar başa çatıb

13 yanvar 2007 10:11 (UTC +04:00)

Azərbaycan Respublikası Dövlət Neft Şirkətinin (ARDNŞ) nümayəndələrinin ABƏŞ-in, “Azəri-Çıraq-Günəşli” layihəsinin operatoru olan “BP-Azərbaycan” şirkətinin, subpodratçı “BOSS Shelf” və “McDermott” birgə müəssisələrinin təmsilçiləri ilə apardıqları iki günlük danışıqlar başa çatıb.
ARDNŞ-ın mətbuat xidmətindən APA-ya verilən məlumata görə, aparılan danışıqlarda ARDNŞ tərəfdən Sərmayələr İdarəsinin rəisi Vaqif Əlıyev, İşlər İdarəsinin rəisi Xaliq Məmmədov, Kapital qoyuluşları İdarəsinin rəisi Ağasəf Əlıyev, ABƏŞ tərəfdən isə AÇG layihəsinin müqavilələr üzrə meneceri Kameron Maklin, konsorsiumun dəniz obyektlərində layihələr üzrə rəhbəri Karol Körni, “BOSS Shelf” birgə müəssisəsinin baş direktoru Riçard Maki iştirak edib. Əmək Məcəlləsində müddətli əmək müqaviləsi üzrə işləyən əməkçilərə heç bir müavinət nəzərdə tutulmasa da, “Əsrin müqaviləsi” çərçivəsində uğurla başa çatmış layihələrdə əmək müqavilələrinə xitam veriləcək işçilərin əməyini mükafatlandırmağın mümkünlüyü ABƏŞ təmsilçilərinin diqqətinə çatdırılıb. Danışıqlar “BOSS Shelf”də sərbəstləşəcək yerli əməkçilərə onların aylıq əmək haqlarının üç mislinin verilməsinə dair razılıqla başa çatıb. Bu danışıqların nəticəsinin müvafiq qaydada sənədləşdirilməsi, bu barədə birğə razılaşma müqaviləsinin hazırlanması üçün üç tərəfli işçi qrupu yaradılıb.
Xatırladaq ki, “Əsrin müqaviləsi” çərçivəsində bəzi layihələrin başa çatması ilə əlaqədar bu ilin əvvəlindən başlayaraq “BOSS Shelf”, “McDermott” və s. subpodratçı müəssisələrdə sərbəstləşəcək yerli mütəxəssislərə bonus verilməsi məsələsi müzakirə olunub. “McDermott” şirkətində ABƏŞ-lə imzalanmış müqaviləyə əsasən, sərbəstləşəcək işçilərə 3 aylıq əmək haqqı məbləğində müavinət ödənildiyi halda, digər subpodratçı olan “BOSS Shelf”də əmək müqavilələrinə xitam verilən işçilər üçün bu vəsait ödənilməyib. Bu isə “McDermott”la eyni layihələrdə, eyni sahələrdə və eyni işlərdə çalışan “BOSS Shelf” əməkdaşlarının narazılığına səbəb olduğundan problemin aradan qaldırılması üçün şirkət rəhbərliyi və kollektivi ARDNŞ və ABƏŞ-ə müraciət edib. /APA/