Hadisə

Ana səhifə

Hadisə

Azərbaycan əsgəri Eldəniz Nuriyev erməni əsirliyindən azad edilib

16 yanvar 2007 11:05 (UTC +04:00)

Məlumatda bildirilir ki, əsgərin təhvil verilməsi prosesi Ağdamın Baş Qərvənd kəndi istiqamətində, qoşunların təmas xəttində həyata keçirilib. Proses DK-nın səyləri və Beynəlxalq Qırmızı Xaç Komitəsinin (BQXK) vasitəçiliyi ilə reallaşıb. E.Nuriyev Azərbaycan Müdafiə Nazirliyinə təhvil verilib. BQXK-nın Azərbaycan nümayəndəliyindən isə APA-ya bildirilib ki, Dağlıq Qarabağda saxlanılan azərbaycanlı hərbi qulluqçu qurumun himayəsi altında Azərbaycanın müvafiq hakimiyyət orqanlarına təhvil verilib. Prosesdə neytral vasitəçi kimi iştirak edən BQXK mandatına uyğun olaraq azad olunmuş hərbi qulluqçunun ötürülməsini bütün tərəflərin müraciətinə əsasən və onların tam əməkdaşlığı şəraitində həyata keçirib. Təhvil vermə əməliyyatından əvvəl qurumun nümayəndələri geri qayıtmaq arzusunda olduğunu təsdiqləmək üçün saxlanılan şəxslə görüşüblər.
Qeyd edək ki, 1976-cı il təvəllüdlü Nuriyev Eldəniz Bəyalı oğlu 2005-ci ilin iyulunda Ağsu rayon Hərbi Komissarlığından hərbi xidmətə çağırılıb. O, cəbhənin cənub istiqamətində, Füzuli rayonu ərazisində 2006-cı il dekabrın 31-də əsir götürülüb. Azərbaycan Müdafiə Nazirliyi hərbçinin azaraq əsir düşdüyünü açıqlayıb. Onu da əlavə edək ki, Azərbaycan ordusunun daha bir əsgəri ermənilərin ötən il dekabrın 24-də əsir götürdüyü Samir Nazim oğlu Məmmədov hələ də əsirlikdədir. Qazaxdakı “N” saylı hərbi hissədə xidmət edən kiçik çavuş S.Məmmədov hərbi xidmətə 1 il əvvəl Bərdə Hərbi Komissarlığından çağırılıb. S.Məmmədov dekabrın 24-də xidmət etdiyi hərbi hissədən 15 km aralıda, neytral zonada Qazax-İcevan sərhədində əsir götürülüb. Azərbaycanlı hərbçinin üzərində silah-sursat olmayıb. /APA/