Hadisə

Ana səhifə

Hadisə

Salyanda keçmiş kolxoz bazarında ticarətlə məşğul olan satıcılar aksiya keçirməyə hazırlaşır

24 avqust 2007 12:33 (UTC +04:00)

“Fəaliyyəti iki ay əvvəl dayandırılmış Salyanın keçmiş kolxoz bazarında ticarətin bərpası yalnız həmin ərazidə sanitar qaydalara tam riayət olunduqdan sonra mümkündür. İndiki halda bazarın fəaliyyəti bərpa oluna bilməz”. Bu açıqlamanı APA-ya Salyan rayon icra hakimiyyətinin başçısı Rasim Bəşirov verib. Onun sözlərinə görə, əslində, bazar adlandırılan yer küçədir və həmin 50-60 kvadratmetrlik ərazidə ticarət sakinlərin müraciətlərindən sonra dayandırılıb. O, ərazidə normal vəziyyətin yaradılması ilə bağlı icra hakimiyyəti tərəfindən bazar rəhbərliyinə və satıcılara 4 dəfə müraciət edildiyini, lakin bu müraciətlərin nəzərə alınmadığını bildirib: “Biz ərazidə sanitar qaydalara riayət olunmayana kimi bazarın fəaliyyətini bərpa etməyəcəyik. Amma normal şərait yaransa, bu, mümkündür. Digər tərəfdən hazırda rayonun 6 yerində yeni bazar var. Orada ticarət edən adamlar həmin bazarlarda da işləyə bilərlər”. Bazarın rəhbəri Füzuli Həsənov isə APA-ya bildirib ki, rayon rəhbərliyinin tələbinə uyğun olaraq onlar ərazidə təmizlik işləri aparıblar: “Hazırda müəyyən yerlərdə təmir işləri gedir, amma icra hakimiyyəti bazarı işə salmaq üçün hələ də bizə konkret cavab vermir”. F. Həsənov bağlanmış bazarın ərazisinə polisin nəzarət etdiyini qeyd edib. Onun sözlərinə görə, orada 200-ə qədər insan ticarətlə məşğul olub və hazırda həmin şəxslər işsizdir. Bazarda ticarətlə məşğul olan Şahin Axundov isə APA-ya bildirib ki, satıcılar sabah aksiya keçirməyi nəzərdə tutublar. Onun sözlərinə görə, bazarın fəaliyyətinin bərpa olunmayacağı halda satıcılar Bakı-Astara yolunu bağlayacaqlar. /APA/