Hadisə

Ana səhifə

Hadisə

Yol qəzalarında 3 nəfər ölüb

18 sentyabr 2007 12:02 (UTC +04:00)

Kürdəmir rayonunda ölümlə nəticələnən yol-nəqliyyat hadisəsi baş verib. Daxili İşlər Nazirliyinin mətbuat xidmətindən APA-ya verilən məlumata görə, rayonun Paramahmudlu kənd sakini Fərhad Qəhrəmanovun idarə etdiyi “VAZ-2106” və Bakı şəhər sakini Vaqif Qədirovun idarə etdiyi “KamAZ” markalı avtomaşınlar toqquşub. Nəticədə F. Qəhrəmanov hadisə yerində keçinib, xəsarət almış sərnişini, Mollakənd kənd sakini Naibə İsgəndərova isə xəstəxanaya yerləşdirilib. Faktla bağlı Kürdəmir RPŞ-də araşdırma aparılır.
Goranboy rayonunun Goran qəsəbəsində Tərtər rayon sakini Hakim Allahverdiyevin idarə etdiyi “VAZ-2107” markalı və Gəncə şəhər sakini Sahib Qarayevin idarə etdiyi “Mersedes” markalı avtomaşınlar toqquşub. Nəticədə H. Allahverdiyev hadisə yerində ölüb, xəsarət almış oğlu Aslan, habelə “Mersedes” markalı avtomaşının sərnişinləri - Bakı şəhər sakinləri Şahbaz Allahverdiyev, onun həyat yoldaşı İradə və oğlu Fərid xəstəxanaya yerləşdirilib. Aslan orada dünyasını dəyişib. Faktla bağlı Goranboy RPŞ-də araşdırma aparılır.
Suraxanı rayonu ərazisində - M. Mustafayev küçəsində müəyyən edilməmiş avtomaşınla İsmayıllı rayon sakini Mübariz Məmmədov vurulmuşdur. Nəticədə xəsarət almış M. Məmmədov xəstəxanaya yerləşdirilib, vəziyyəti ağırdır. Faktla bağlı Suraxanı RPİ-də araşdırma aparılır. /APA/