Hadisə

Ana səhifə

Hadisə

MTN ABŞ-ın Azərbaycandakı səfirliyinə qarşı terror aksiyası planlaşdıran radikal vəhhabi dəstəsinin sonuncu üzvünü də həbs edib

21 noyabr 2007 09:48 (UTC +04:00)

Nazirliyin İctimai Əlaqələr Mərkəzindən APA-ya daxil olan məlumata görə, qrupun qaçıb gizlənə bilmiş üzvü Bəxtiyar Orucovun zərərsizləşdirilməsi üzrə MTN tərəfindən intensiv davam etdirilən əməliyyat-axtarış tədbirləri ilə noyabrın 20-də saat 03:00 radələrində o, Bakı şəhərində tutulub. İstintaqa ifadəsində B. Orucov da həmin qrupun ABŞ-ın Azərbaycandakı səfirliyinə qarşı terrorçuluq aksiyası keçirmək planlarını, bu məqsədlə, həmçinin, vaxtilə ölkəmizdə terror aktları törətməyi planlaşdıran, lakin MTN tərəfindən zərərsizləşdirilmiş və hazırda Ədliyyə Nazirliyi Penitensiar Xidmətinin Qobustan qapalı həbsxanasında cəza çəkən “din qardaşları”nın azad olunması üçün hərbi hissədən silah-sursat oğurladıqlarını və Bakı şəhərindəki “LUKoil” yanacaqdoldurma məntəqəsinə silahlı basqın etdiklərini etiraf edib. Yaxalanan zaman B. Orucov hərbi hissədən oğurladıqları silah-sursatdan özündə saxladığı sonuncu 2 əl qumbarasını da təhvil verib.
Beləliklə, ağır cinayət hadisələrinin törədilməsində təqsirləndirilən 11 nəfərdən ibarət təhlükəli silahlı qrupun bütün üzvləri zərərsizləşdirilib, onlardan 4 “AKM” tipli avtomat, güllə ilə dolu 18 avtomat darağı, 1 “PK” əl pulemyotu və ona aid 2 sandıqça, 20 əl qumbarası, 20 alışdırıcı və digər hərbi ləvazimatlar aşkar olunaraq götürülüb.
Qeyd edək ki, Müdafiə Nazirliyinin Xanlar rayonu ərazisində yerləşən “N” saylı hərbi hissəsinin zabiti Kamran Əsədov özünün də daxil olduğu radikal vəhhabi qrupunun digər üzvləri ilə qabaqcadan əlbir olub cinayət əlaqəsinə girərək xidmət etdiyi hərbi hissədən 4 avtomat, 1 “PK” əl pulemyotu, 20 əl qumbarası, xeyli sayda avtomat silah üçün patron və hərbi ləvazimat oğurlayaraq hərbi hissəni özbaşına tərk edib.
Qrupun bəzi xarici ölkələrin Azərbaycandakı səfirliklərinə qarşı terrorçuluq aksiyası keçirmək planları barədə daxil olmuş məlumatlar əsasında MTN tərəfindən bu cinayətkar niyyətlərin qabaqlanması üçün xüsusi əməliyyat hazırlanaraq həyata keçirilib. Belə ki, oktyabrın 27-də qrupun bir neçə üzvünün gizləndiyi Bakı şəhəri, Sabunçu rayonu, Maştağa qəsəbəsinin Bağ massivindəki ünvanda keçirilən əməliyyat tədbirləri ilə həmin şəxslər yaxalanıb, qrupun bir üzvü silahlı müqavimət göstərməyə cəhd edərkən məhv edilib. Oğurlanaraq gizlədilmiş silah-sursatın bir hissəsi həmin ünvanda, bir hissəsi isə İsmayıllı rayonu ərazisində aşkar edilərək götürülüb. Oktyabrın 30-da qrupun axtarışda olan digər üzvləri - Kamran Əsədov, Fərid Cabbarov və Bəxtiyar Orucov Bakı şəhərində yerləşən “LUKoil” yanacaqdoldurma məntəqəsinə silahlı basqın edərək, odlu silahdan atəş açmaqla işçilərdən birinə ağır bədən xəsarəti yetirib və pul vəsaiti ələ keçirərək hadisə yerindən qaçıb gizlənib. MTN tərəfindən bu təhlükəli silahlı qrupun tezliklə zərərsizləşdirilməsi istiqamətində hərtərəfli əməliyyat-axtarış tədbirləri davam etdirilib, qrupun üzvlərindən Elşən Məmmədov və Vüqar Əliyev, bir qədər sonra isə - 2007-ci il noyabrın 9-da Kamran Əsədov və Fərid Cabbarov tutulublar. /APA/