Bakı-APA. Vatikanda Sikstin kapellasında quraşdırılmış bacadan qara tüstü buraxılıb, bu isə o deməkdir ki, Papanın seçilməsi ilə bağlı keçirilən səsvermənin birinci turu nəticəsiz olub. Xatırladaq ki, Papanın seçilib-seçilmədiyi Sikstin kapellasının bacasından çıxan tüstünün rəngi ilə müəyyənləşir. Belə ki, qara tüstü Papanın seçilə bilmədiyini, ağ tüstü seçildiyini bildirir.
APA-nın “BBC”yə istinadən verdiyi xəbərə, ənənəyə görə, səsvermənin birinci günündə kardinallar yalnız bir dəfə səs verir, bu isə o deməkdir ki, qalan turlar növbəti günlərdə keçiriləcək. Yeni Papa müəyyən olanadək kardinallar gündə dörd dəfə səs verəcək.
Xatırladaq ki, Roma Papası XVI Benedikt fevralın 28-də taxtdan imtina edib.