Sənaye və energetika

Ana səhifə

MHŞT-nin Azərbaycanda Tətbiqi üzrə ilk illik hesabat dərc edilib

02 iyul 2012 15:15 (UTC +04:00)

Bakı – APA-Economics. Mineral Ehtiyatların Hasilatı ilə Məşğul olan Sənaye Sahələrində Şəffaflıq Təşəbbüsünün (MHŞT) Azərbaycanda tətbiqi üzrə 2011-ci ili əhatə edən ilk hesabat dərc olunub.

Dövlət Neft Fondundan «APA-Economics»ə verilən məlumata görə, təqdim olunmuş yeni hesabat MHŞT üzrə 2011-ci ildə Parisdə keçirilmiş V Qlobal Konfransda qəbul edilmiş MHŞT üzrə yeni qaydalara əsasən dərc edilib.

Azərbaycanda belə bir sənədin ilk dəfə tərtib edildiyi nəzərə alınaraq 2011-ci ildə görülmüş işlərlə yanaşı, hesabatda MHŞT-nin fəlsəfəsi, Azərbaycanda tətbiqi tarixi, Çoxtərəfli Qrupun fəaliyyəti, açıqlanmış 15 MHŞT hesabatının təhlili və əldə edilmiş nailiyyətlər barədə məlumatlar əks olunub. Hesabatda MHŞT iştirakçılarının - Hökumət Komissiyası, Mədən Sənayesində Şəffaflığın Artırılması Koalisiyası və Şirkətlər Qrupunun nümayəndələrinin rəyləri də verilib.

Xatırladaq ki, MHŞT xüsusi çoxtərəfli və şirkətlər, hökumətlər, sərmayəçilər və vətəndaş cəmiyyəti təşkilatları tərəfindən dəstəklənən könüllü təşəbbüsdür. MHŞT neft, qaz və mədən hasilatı sahəsində şəffaflığın təmin edilməsində qlobal standartdır. Azərbaycan MHŞT prosesinə 2003-cü ildə qoşulub. Azərbaycan MHŞT-nin qiymətləndirilməsi prosesindən keçən və MHŞT-nin tamhüquqlu üzvü statusunu alan ilk MHŞT ölkəsidir. MHŞT prinsip və meyarlarına tam cavab verən ölkə olması və MHŞT-nin tətbiqi sahəsində əldə etdiyi nailiyyətlərə görə Azərbaycana “2009-cu il MHŞT mükafatı” təqdim edilib.