Bakı – APA-Economics. İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən Bakı şəhəri, Sabunçu rayonu, Zabrat qəsəbəsində fəaliyyət göstərən fiziki şəxs Əlişov Ülvi Əbülfət oğluna məxsus sexdə aparılan yoxlama zamanı saxta elektrik kabel və naqillər istehsal edildiyi müəyyən olunub.
Nazirlikdən “APA-Economics”ə verilən məlumata görə, sexdə istehsal olunan elektrik kabel və naqillərin müvafiq uyğunluq sertifikatı olmadan istehsal edildiyi, markalanma məlumatlarında isə məhsulların sertifikatlaşdırılması barədə yanlış məlumatların verildiyi, eləcə də kabel və naqillərin istehlakçılara Türkiyə istehsalı olan “İEGE kablo”, “Ümid kablo”, “STS kablo”, “İES kablo” adları altında təqdim edildiyi aşkarlanıb.
Bununla yanaşı, Ülvi Əlişov tərəfindən yerli təsərrüfat subyektinə məxsus əmtəə nişanından qanunsuz istifadə edildiyi də müəyyən olunub. Yoxlama zamanı aşkar edilmiş saxta 175 min metr elektrik kabel və naqillərin satışı dayandırılıb.
Aşkar edilmiş qanun pozuntusu ilə əlaqədar fiziki şəxs Ülvi Əlişov barəsində antiinhisar qanunvericiliyinin tələblərinin pozulması əlamətləri üzrə iş qaldırılıb.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
