İnfrastruktur

Ana səhifə

İnfrastruktur

Bakı-Şamaxı avtomobil yolu yaxın bir həftəyə istifadəyə veriləcək

21 oktyabr 2009 13:14 (UTC +04:00)

Bakı. Elnur Hüseynquluyev - APA-Economics. Bakı-Şamaxı-Muğanlı avtomobil yolunun Bakı-Şamaxı hissəsinin yaxın bir həftə ərzində istifadəyə verilməsi planlaşdırılır. Bunu «APA-Economics»ə açıqlamasında layihənin subpodratçılarından olan «Akkord İnşaat Sənaye» MMC-nin mətbuat xidmətinin rəhbəri Afaq Quliyeva bildirib.

A.Quliyevanın sözlərinə görə, artıq işlərin 90%-i tamamlanıb və dünənə olan məlumata görə, 5 km-lik ərazidə son asfalt üzlüyün vurulması işləri aparılır: «Hazırda yol kənarında nişanların və yol çiyinlərinin qoyulması prosesi gedir. Bundan başqa, 62 km-lik məsafədə 68 avtobus dayanacağı quraşdırılacaq və bundan sonra yol tamamlanmış hesab olunacaq».

A.Quliyeva bildirib ki, hava şəraiti imkan verərsə, asfaltlama işləri növbəti həftə ərzində yekunlaşacaq.

Qeyd edək ki, Bakı-Şamaxı-Muğanlı yolunun yenidən qurulması layihəsinə 2008-ci ilin iyul ayında başlanıb. Layihənin podratçısı İtaliyanın «Todini» şirkətidir. Magistralın 9-77-ci km-ləri əhatə edən birinci hissəsində işləri «Akkord», 78-123-cü km-ləri əhatə edən ikinci hissəsində isə «Azərtikintiservis» şirkəti həyata keçirir. Layihənin dəyəri 78 mln. manatdır. Layihə Dünya Bankı və Azərbaycan hökuməti (20% paya malikdir) tərəfindən maliyyələşdirilir.