İnfrastruktur

Ana səhifə

İnfrastruktur

Azərbaycan, Rusiya və İran dəmir yolu administrasiyaları rəhbərlərinin bu ilin sentyabrında Bakıda görüşü keçiriləcək

13 avqust 2008 14:11 (UTC +04:00)

Bakı. Rəşad Süleymanov – APA-Economics. Cari ilin sentyabr ayında Bakıda Azərbaycan, Rusiya və İran dəmir yolu administrasiyaları rəhbərlərinin görüşünün keçirilməsi nəzərdə tutulur. Azərbaycan Dövlət Dəmir Yolundan (ADDY) «APA-Economics»ə verilən məlumata görə, görüşdə dəmir yollarının rəhbərləri Şimal-Cənub nəqliyyat dəhlizi layihəsi üzrə işçi qrupları tərəfindən görülən işlər, hazırlanmış sənədlərlə tanış olacaqlar.

Görüşdə, həmçinin «Rusiya Dəmir Yolları» ASC-nin işlərin sürətləndirilməsi üçün layihə ilə bağlı təqdim etdiyi «Birgə əməkdaşlıq konsepsiyası»nın biznes-planına baxılacaq. İclas çərçivəsində dəmir yolunun tikintisini və istismarını həyata keçirəcək konsorsiumun yaradılması məsələsi də müzakirə olunacaq. Sonuncu məsələyə dair qərarın qəbul ediləcəyi gözlənilir.

Qeyd edək ki, Şimal-Cənub nəqliyyat dəhlizi haqqında razılaşma Rusiya, İran və Hindistan arasında 2000-ci ilin sentyabr ayında imzalanıb. Razılaşma bütün nəqliyyat növlərinə – dəmir yolu, dəniz, çay, avtomobil və hava nəqliyyatına aiddir. Proqnozlara görə, tam gücü ilə fəaliyyət göstərəcəyi təqdirdə Şimal-Cənub nəqliyyat dəhlizi vasitəsi ilə sonrakı mərhələlərdə daşınan yüklərin həcmi ildə 15 mln. tona qədər artacaq.

Azərbaycan bu sazişə 2005-ci ildə qoşulub. Şimal-Cənub nəqliyyat dəhlizi layihəsi çərçivəsində Azərbaycanda 8,5 km yeni dəmir yolu, hər biri 1 050 metr olmaqla 4 stansiya yolu, sərhəddə gömrük, viza və təkər dəyişmə məntəqəsi inşa olunacaq. Bundan başqa, İranla birgə Astara çayı üzərindən 101 metr uzunluğunda körpü inşa ediləcək.

Şimal-Cənub_nəqliyyat_dəhliz