İnfrastruktur

Ana səhifə

İnfrastruktur

Avqustda Bakı şəhəri üzrə torpağın qiymətində ən çox artım Qaradağ rayonunda qeydə alınıb

10 sentyabr 2008 14:50 (UTC +04:00)

Bakı. Rəşad Süleymanov – APA-Economics. Cari ilin avqust ayında Bakı şəhəri üzrə torpaq bazarında orta qiymətlərdəki cüzi artımı nəzərə almasaq, bazarın stabil olduğunu söyləmək mümkündür. Ay ərzində bazara çıxarılan 1 sot torpağın orta qiyməti 1% artaraq 25 117 $/sot (ötən ay 24865 $/sot) səviyyəsinə qalxıb. Bu barədə «APA-Economics»ə «Əmlak Bazarı İştirakçıları» İctimai Birliyindən məlumat verilib.

İyul ayı ilə müqayisədə rayonlar üzrə ən çox qiymət artımı Qaradağ (20,6%), qiymət azalması isə Binəqədi (-6,7%) rayonlarında qeydə alınıb. Avqust ayında bazara təklif olunan ümumi 876 ha torpaq sahəsinin 78%-ni boş sahə, qalanını isə qeyri-yaşayış və köhnə yaşayış sahələri təşkil edib.

Torpaq bazarının mövsümlə əlaqədar olaraq şəhərətrafı və paytaxtdan kənar ərazilərə doğru genişlənməsi tendensiyası avqustun sonlarına doğru nisbətən səngiməyə başlayıb. Bu isə son aylarda baş verən qiymət azalmasının qarşısını alıb. Buna baxmayaraq, ay ərzində torpaq üzərində bağlanan alqı-satqı əqdlərinin sayında azalma müşahidə olunub və bazarın aktivliyi əvvəlki ayda olduğu kimi üfüqi xətt üzrə hərəkət edib.

Yaranmış vəziyyət əsasən şəhərin mərkəzində boş torpaq sahələrinin məhdud səviyyəyə enməsi nəticəsində III və IV zonalarda torpaq sahələrinin bazara real dəyərindən baha təklif olunması və əksər sahələrin hüquqi sənədlərinin olmaması ilə bağlıdır.

Bununla yanaşı, hazırda torpaq bazarında ən aktiv rayonlar sırasına Abşeron və Səbailin mərkəzdən kənar əraziləri (həyət evləri və bağ sahələrinin hesabına), həmçinin Binəqədi (sənaye obyektlərinin qalıqlarından təmizlənmə hesabına) və Sabunçu (boş sahələr hesabına) rayonları başçılıq edir. Bazarın ən passiv rayonu isə Nəsimi rayonudur.

Ay ərzində bazara təklif olunan ən bahalı torpaq sahəsi Nərimanov rayonundakı Atatürk prospektində yerləşib. Belə ki, burda təklif olunan torpağın bir sotunun qiyməti 425 000 dollar olub. Ən ucuz torpaq sahəsi isə Sabunçu rayonundakı Ləhiş qəsəbəsində olub. Bu ərazidən bazara təklif olunan torpağın bir sotunun dəyəri 660 ABŞ dolları təşkil edib.