İnfrastruktur

Ana səhifə

İnfrastruktur

Azərbaycanla Türkmənistan arasında TAE-nin Xəzər seqmentinin çəkilişi ilə bağlı ilkin razılıq əldə edilib

10 sentyabr 2008 15:03 (UTC +04:00)

Bakı. İlhamə İsabalayeva - APA-Economics. Regional Rabitə Birliyinin İnformatizasiya üzrə Koordinasiya Şurasının sentyabrın 25-26-da Aşqabadda (Türkmənistan) keçiriləcək 13-cü iclasında Trans-Asiya Avropa (TAE) fiber optik kabel magistralının Xəzər seqmentinin tikintisi layihəsi üzrə müzakirələr aparılacaq. “APA-Economics”in məlumatına görə, bunu Azərbaycanın rabitə və informasiya texnologiyaları naziri Əli Abbasov bildirib. Nazir qeyd edib ki, hazırda ən vacib məsələlərdən biri Azərbaycan-Türkmənistan arasında dənizaltı optik magistralın çəkilməsidir. Artıq hökumətlərarası komissiya bu layihənin həyata keçirilməsinə ilk müsbət rəyini verib. Bu ilin noyabrın 11-14-də Bakıda keçiriləcək Bakutel sərgi-konfransı çərçivəsində layihənin iştirakçıları ilə bağlı son qərar veriləcək.

Qeyd edək ki, XX əsrin ən böyük tikintilərindən sayılan TAE magistralı Çinin Şanxay şəhərindən başlayaraq, Almaniyanın Frankfurt-Mayn şəhərinədək 24 min kilometrlik məsafədə uzanan böyük əhəmiyyətə malik rabitə şəbəkəsidir. TAE fiber-optik magistral xəttinin Azərbaycan ərazisində tikintisi «Aztelekom» İstehsalat Birliyi ilə Türkiyənin «Hesfibel» şirkəti arasında bağlanmış müqaviləyə əsasən 1999-cu ildə başlayıb və onun tikintisi ölkə ərazisində eyni zamanda üç istiqamət üzrə aparılıb. Bunlar Bakı-Qazax, Bakı-Astara və Bakı-Samur istiqamətləridir. TAE fiber-optik kabel magistralının istismara verilməsindən sonra ilk dəfə olaraq Azərbaycan, Gürcüstan, Rusiya, İran, Türkiyə və Ukrayna istiqamətində birbaşa müasir yüksək keyfiyyətli rəqəmsal beynəlxalq rabitə təşkil etmək mümkün olub.

1999-cu ildə aparılan hesablamalara görə, Xəzər dənizinin dibi ilə kabelin tikintisinin dəyəri 10 mln. dollar təşkil edir.

Qeyd edək ki, TAE-nin Xəzər seqmentində tikinti işlərinin aparılması ilə bağlı artıq Azərbaycanın Beynəlxalq Əlaqələr və Hesablama Mərkəzi və Qazaxıstanın «KazTransCom» arasında protokol imzalanıb.

TAE seqmenti üzrə Bakı (Azərbaycan)-Astara (İran) xəttinin uzunluğu təxminən 345, Bakı-Rusiya xəttinin uzunluğu 250 km, Siyəzən-Aktau xəttinin uzunluğu təxminən 400 km-dir.