İnfrastruktur

Ana səhifə

İnfrastruktur

Bakının birinci dairəvi avtomobil yolunun torpaq yatağının hazırlanması yaxın aylarda başa çatacaq

17 sentyabr 2008 13:27 (UTC +04:00)

Bakı. Rəşad Süleymanov – APA-Economics. «Bakı Dairəvi avtomobil yolu-I» layihəsi üzrə yolun torpaq yatağının hazırlanmasını yaxın bir neçə ay ərzində başa çatdırılacaq. Bu barədə «APA-Economics»iə «Azəryolservis» ASC-dən məlumat verilib.
Artıq layihənin əhatə edəcəyi birinci hissədə yolun əsas hissəsinin tikintisi başa çatıb. Digər hissələrdə isə kommunikasiyaların dəyişdirilməsi həyata keçirilib. Hazırda yol ötürücülərinin və yağış sularının ötürülməsi üçün qurğuların tikintisi aparılır.
Qeyd edək ki, uzunluğu 21,5 km olan «Bakı Dairəvi avtomobil yolu-I» Biləcəri yoxuşundan başlayır, «Qurd qapısı»ndan keçərək Lökbatan dairəsinə çıxır, yəni Bakı-Ələt-Qazax-Gürcüstan sərhədi avtomobil magistralının 22-ci km-dək uzanacaq. Yol birinci texniki dərəcəli və 6 hərəkət zolaqlı olacaq. Avtomobil yolunun layihəsi üç əsas hissədən ibarətdir. Yolun üzərində 4 qovşaq, 6 yol ötürücüsü, bir neçə avtomobil və piyada keçidi inşa ediləcək.
Yolun birinci hissəsi Biləcəri yoxuşundan Qanlı gölə qədər hissəsini əhatə edir və uzunluğu 5,5 km-dir. Bu hissədə yenidənqurma işlərinin, Qanlı göldən Lökbatan dairəsinədək 9 km uzunluğunda ikinci hissədə yeni yolun tikintisi, Lökbatan dairəsindən Bakı-Ələt yolunadək 7 km uzunluğunda yolda isə yenidənqurma işlərinin aparılması nəzərdə tutulur.
Qeyd edək ki, Küveyt Fondu, Abu-Dabi Fondu və Azərbaycan hökuməti tərəfindən maliyyələşdirilən layihənin dəyəri 49,5 mln. ABŞ dollarıdır. Layihənin podratçısı Türkiyənin «Mak-Yol İnşaat, Sənaye, Turizm və Ticarət A.Ş.» şirkəti və Küveytin «Kopri» şirkətinin birgə yaratdığı «Mak-Yol- Kopri» konsorsiumudur.